Opolifi moshitukulwa shaMusati, otai kongo omulumenhu ou vati a dipaa omukainhu weedula 42 nekuva.

Otaku hokololwa kutya ekuva kwa li la hakela momutwe wanakufya. 

Oshiningwanima osha ningwa neudo momafiku 2, komukunda Onandjo, moshikandjohoololo shaTamanzi efimbo loufiku.

Eembangi oda yandja ouyelele kopolifi kutya vati oda uda omukainhu ta kuu mokati koufiku, nokonima ova uda ondaka yomulumenhu tai tukana oitya yakula moule.

Omupopiliko wopolifi moNamibia omupedu komufala Kauna Shikwambi okwa ti, konima yefimbo eembangi oda uda ondaka yokaana kashona oyo aike tai kwane mokule. 

“Eembangi oda lombwela opolifi kutya konima eshi da uda ondaka yokaana tai kwena, oda ninga onghendabala yo kuya poshiningwanima, opo. 

Oda hanga olutu lomukainhu li he na omwenyo li li moshikungulu shohonde, nekuva lapandekwa momutwe,” ta ti. 

Omakonakono aa aningilwa olutu lanakufya kopolifi vati okwa holola kutya, ekuva shili ola hangika momutwe wanakufya kombinga yoko lulyo, oshoyo oipute ili mofingo yaye.

Olutu lanakufya ola twalwa kokila yopolifi mOkahao, oko laka ningilwa omakonaakono. 

Omufekelwa oo eli molukongo vati okushiivike nawa pomudingonoko osho yo kopolifi.

Moshiningwanima shikwao opolifi moshitukulwa shaShana otai kongo ovapambele vomukainhu oo a ka nifila omwenyo waye moshiponga sha kula shohauto pokati kOngwediva nOndangwa omaandaxa.

Omupopiliko wopolifi moshitukulwa shaShana Frieda Shikole okwa ti oshiponga osha pula eemwenyo dovanhu vavali omukainhu nomulumenhu.

“Ovapambele vanakufya womulumenhu ova dula okudimbuluka olutu lomupambele wavo, nova pambele vaye ova shiivifilwa. Ovapambele vomukainhu ka ve shiivike fiyo paife,” ta ti. Okwa twikila kutya nakufya vati okwa li a djala okambidja kaxupi kaluala, ombulukweva imbulau. Okwa weda po yoo kutya okwa hangika aumbata ondjato yo peke. 

Olutu la nakufya vati ola twalwa kokila kOshakati, nau ta kongo ouyelele kombinga yomupambele a kana okudja omaandaxa na dengele ko 081 269 5397. 

taimihaihambo2000@gmail.com