ONGWEDIVA – Hamushangadjai wehangano leebesa neeTaxi (NABTA), Pendapala Nakathingo ota okwa ti ehangano lavo otali pula opo ondado yoTaxi i kale ya wedelwa noN$2 molwashi omahooli okwa ninga ondilo.
Nakathingo okwa ti otava ka yandja omukanda kouministeli woikwamina neenghono noshoyo ouministeli woyeendifo opo va kukundafana kombinga yoTaxi i kale ya wedelwa i ninge eeN$15.
Meenghundafana davo va ninga naKundana oshivike shadja ko, Nakathingo okwa ti omahooli paife okwa ninga ndilo shaashi ondado oya wedelwa noikulya oya ninga ondilo meefitola.
“Ovashingi veeTaxi ihava longo vali oshimaliwa shiyamba molwashi ohava longele ashike omahooli. Onghee otava xupu noudjuu shaashi ihava xupupo vali noshimaliwa shokulanda oipumbiwa yomeumbo,” Nakathingo ta ti.
Okwa ti ngeenge ondado yoTaxi oya wedelwa otashi kwafele ovashingi va xupe po noshimaliwa shokulikwafela.
“Ovashingi voTaxi navo otava kongo ouxupilo ngaashi naana ovanangeshefa aveshe veendodo da yooloka. Onghee epangelo na li tale eembinga adishe tete manga ina li ninga etokolo lokuwedela omahooli,” ta ti.
Nakathingo okwa ti ehangano lavo ota li twikile nokuetela omauwa ovashingi voTaxi opo va dule okuxupa noupu.
“Oshiwana otashi ka shivifilwa pambelewa ngeenge omukanda wetu wa tambulwa ko kepangelo opo ondado yoTaxi i kale ya wedelwa,” ta ti.
Nakathingo okwa nyenyeta yoo kombinga yovanhu ve na eelefa dokufelefula mopate ashike inadi shangifwa okupewa epitikilo lokundeka ovanhu.
vashingi veeTaxi ova hokolola tava ti otava xupu shokadila molwashi ovanhu vamwe ihava futu oshimaliwa shelixwapo sheeN$13 ngeenge tava twalelwa.
Hangula Timoteus ha shingi oTaxi mOndangwa okwa ti mefiku alishe li hadi oha dulu okulondeka ovanhu vahapu ve na eeN$10.
“EeN$10 odo ngeenge owe di tula kumwe owa longa ashike oshimaliwa shomahooli omanga keumbo kuna eshi totwaleleko,” ta ti.
Ovanafikola noshoyo ovakwashiwana ova ti ngeenge ondado yoTaxi oya wedelwa otava ka mona oixuna molwashi itava ka dula okumona eeN$15.
“Ohatu mono nale oixuna yokufuta oN$13, ngeenge oTaxi oya wedelwa walye tuu,” omunafikola ta ti.