Xoa-aos: Regina Simasikus
ǀAEǁGAMS – ǀGuriǁgûdi tsîn ge nēsi îaron âdi !aroma !naes sertifikata hō ǁkhā, ǁgûb nî ǀkhai soas !nâ. Nēs ge ǁkhāti ǀgūǁaeb kōse mā-amsa tama ge hâ i, Ministris !Hū!nāsi tsî !Hūb !nâ ǂoa tsî ǂgâxas dis ra mîsa !oa. Nē ministris di mîgowaba-aos, Salome Kambalas ge ǁâǁawab !nâ-ūs ge New Erab ǂhôare-ao-i ǀkha ūhâ i dî!nâǁgamǁares !nâ ge mî, ministris kai !gomsiba !onkhao hâse ra dīhe !naes xoamâidi ǀkha ge ūhâ isa, ǁgūgu gere ǀgâb khami bē tsî ǁnās ǀkha ǁîb di mā-ams tamas ka io ǁnāpa hâs ǀkha ǀguis xoamâisa nî hâs a xui-ao ǁgûde īǁoasasib nēti ī xoamâis dis ǀkha !gomma gere tsâ xui-ao. “ǁGûdi ge !naes ǀkha ona nî xoamâi. ǁGûdi ge ǁîdi fanga sîsenū ǁkhā tsî ǁgûb ga ega a hā tsî ti ra nî ǁnâugus karao ǁîb di fanni !oa ǁkhawa a dawabahe ǁkhā,” tis ge Kambalasa gere ǁgui!ā. Nē mîǁguib ge ǀgôa-i di !gâi!gâb kōse hâ, !naes ǂhaweb osen ǁîna, !gōsase skolǂgâs tsoatsoas ǀkha !gomma ra tsâ amaga.
“ǀGôan ge !gōsase Xrat 10 !nân ra sī tsî !naes ǂhawega ūhâ tama i ǁaeb ai gaxu raigu !nâ si ra mā in ǂganamsensa dī,” tis ge Kambalasa ǀaro tsî gere mî. Ministris !Hū!nāsi tsî !Hūb !nâ ǂoa tsî ǂgâxas dis di mâisan ge nēsi !kharaga !ân !hūb din !nâ ǀaeǁgâude sari hâ, !naetoa ra ǀgôaron di xoamâisendi ǀkha huis !aroma. “ǀGui timî tsîs ge ministrisa nē ǀasa ǀgauba a sîsenxa kai tsî ǁkhaukhâisa ǁgûdi ai a dīsa xu di ge ǀguriǁgûde ǂgui !gôagu !nâ xoamâis ǀgôaron dis !aroma ra hā. ǀNî ǁgûdi ge !gomsiba ūhâ ǀgôa-e ǁîs di fanni !nâ xoamâis ǀkha, !hao!nāsi ǁnaetigu !oas nēsa mā-amsa tama hâ xui-ao, tsî ra !âu ǂgao ǁgûb nî ǀguitsē hā tsî ǁîb fanni !nâ !hao!nāsi naetigu !oa nē ǀgôa-e hā xoamâisa. Nēti ī mâsigu !nân ge ministris mâisana ǁîde ǂhâǂhâsasib ǀgôa-i nî !naes ǂhaweba ūhâbas dis tsî !gâi!gâna ra mî!āba,” tis ge Kambalasa gere ǀgonǀgon!gao.