Matheus David 

Foibe Sakarias, ǀAeǁgams di ǁanǂgāsabes ge mâtib ge huib hîas ge Nutrition and Food Security Alliance of Namibiasa (NAFSAN) xu a !khō!oaba, ǁîsa sîsenosiba xu aitsama kō!gâsens kōse a hā-ūsa dâb xa ǀoahâse gere ǀgoragu. 

Sakarias ge ǀgūǁae ǂnûs hîas ge Protea Hotels tawa ǀAeǁgams !nâ ǁhao!nâ hâ is tawas gere !hoa soab ai nēsa gere ǁgae. Nē ǂnûs tawas ge ǂhanusi ǂan kais ǁnāti ī !hûǁares NAFSANs tsî ǀHûhâsigu ai !Gao!gaosa ǂNûiǂgādi (CBO) aegu ge hâs disa ge dīhe. Nē ǂnûiǂgādi ge kai!ā !garo!ā ǀkharigu Omahekeb, Hardap, Otjozondjupab tsî ǀKhomas ǀkharigu di ǀhûhâsigu di ǁanina ǂgaoǀkhāsa ǂans tsî ǁkhāsigu ǀkha ǁāǁā tsî huiba ra m ā. 

Nē !hûǁares !nâ-ūn ge !gâi!gâ-aona ra mâxōǀkhāhe in ǁgâuǂnamigu ân !nâ !hanaga ǂgā, ǁgau!nâkhâide !khō!oa ǂhâǂhâsasib tsî gaxu ǁaeb !nâs !gâise ǂûsa a ūhâ ǁkhā !gâi sîsenǂuigu ǂnamipe. ǀNai ge nē ǁkhāǁkhākhâidi tsî ǁāǁās !nâ a domdore khoes ases ge Sakariasa a mîs ge, ǁîs nēsi aitsama a ǀhonkhoebasen !khaisa tsîs nē !hanas hîas ge NAFSANs huib ǀkha a ǂnuwisa, nēsi kai huib ase, marisise tsî ǂûn ǀkhāb ai ǁîs di omaris âsa ība !khaisa. “Tita ge nēsi aitsama ti ǂûna ra ǂgâxa-ū tsî aitsama kōsen. Nē !ēs ge tita aitsama ǂharugu-aosis daosa ǁkhowa-amba tsî naun ti ǀhûhâsib din tsîna ta nî ǁāǁās kōse ge sī-ū,” tis ge ge mî. NAFSANs di Danas Projekdi !ereamxasiba tani hâs, Maria Kandjungus ge mîs ge, nē ǀō-aisa projeks di ǁgūbas ǀhûhâsigu di ǂhanub aegu hâ !nubusiga !khō!omgus nâ-ū ǀoroǀoros ai hâsa. 

“Sida projeks ge xoaǁguigu nî sîsenǂuihe !khaisa aimâbas tsî ǁnās !oagu ǂhâbasa huisenxūna ǂoaxa-ūs ai hâsa. 

Sida ǁkhāti ra ǁawoǁawos ge, ǀhûhâsigu di domgu nî ǂhanub ūhâ ǀaweǁguigu, ǂûna ǁawoǁawos digu !nâ ǂnûkhaebahesa,” tis ge gere ǁgui!ā. Simon Mukenab, DAPP TCEs di mâisab ge ǁgui!ā tsî gere mî, mâtib ǁîn proxramma ǂurusib !oabade !gâise ǂûs sîsenǂuiba khoena hōhō!nâs ǀkha ra !hûǁare !khaisa. “Sida ge a ǂhomisa HIVs !âidi tsî khoena !gâise !hoakhâi!nâs, TBs !âide dīs tsî ǀhāhâsiga ǂuruse ûis tsî ǂûs ǂnamipe ǁkhāǁkhākhâis tsîna,” tib ge ge mî.