MUTAYI wa Kopano ya Macaba o bona za lico, seu kupile pene ye likana 118 million dollars ya kutusa naha Zimbabwe yena ni palo ye likana 3.3 million ya bayahi ba naha ba ba taselizwe ki lukupwe.
Mutayi o zibahala ka World Food Programme (WFP), ne u talusize sunda ye felile mwasitatimende kuli, u lela kutusa palo ya bayahi yeo, ye likana 3.3 million ya bayahi ba naha Zimbabwe ka likweli ze lobapeli (8).
“Mianda-nda ya bayahi ba naha yani ba taselizwe ki lukupwe kakuli lico za bona linze li sweli kuno feela mi kacwalo bun`ata bwa bona bata tokwa tuso kwamafelo a silimo se,” ne kubulezi yo muhulu wa sikiliti, Amir Abdulla.
“Lu lela kufepa palo ye pahami ya bayahi mwa likweli ze lobapeli ze taha kuli lu kone kulilimanisa butata bwa lukupwe mi kacwalo luta tokwa neulo ye pahami kabubebe luli.”
Mwanako ya cwale ba WFP bana ni lico za buima bobu likana 138, 000 metric tonnes ze swanela kufiwa bayahi ba naha Zimbabwe kono kusa tokwahala palo ye likana 207, 000 tonnes ya lico zen`wi ze cwale ka bupi ni mbonyi hala zen`wi, ni kuyema fa pene ye likana 118 million dollars kaufeela.
Mungendenge wa kutateka ni kufa lico uta tateka cwale ni kufeela mwakweli ya Lungu silimo se si taha haiba lika kaufeela inge li zamaya sina kamo ku lelezwi.
Haiba kusa fumanehi pene yen`wi ya n`ambekelo fa lico ze liten`I cwale, lita feela mwa kweli ya Muimunene silimo se mi mwalikweli ze cwale ka N`ulule ita ba likayamana tota.
Sikwata sa tutengo twa kwa mukunda totu zibahala ka C-SAFE ili tutengo totu fumana lituso kwa naha America tu lela kufa lico kwa palo ye likana 800 000 ya bayahi ba naha yani ni kutisa palo kaufeela fa 4.1 million ne ku tumusizwe.
Naha Zimbabwe I taselizwe ki likayamana la sifumu kubeya liteko za lico ni libyana ze pahami ahulu ni kufita mwa lifasi lote.
Fahalimu ya ze kaufeela, batu baba nee kuba ketalizoho haba sebezi.
Palo ye pahami ya bayahi I taluswa kuli I pila ka maemo maswe a bunjebwe.