Charles Ndeumane
ONGWEDIVA – Omukiintu a li a pumwa kohauto ta yi hingwa kokanona petameko lyomvula ndjika okwa ti okugulu kwe otaku ehama, ye keshiwo kutya opolisi oya thikama peno moshipotha she, onkene e li momalimbililo.
Omukalimo gwomomukunda Omatando mOngwediva Dorkas Mbengela, 25, ngoka anuwa a lyatelwe kohauto ndjoka ya li ta yi hingwa kokanona hoka ka li na he muFebuluali nuumvo okwa ti ke uvite ombili oshoka sigo oompaka ke shi kutya oshipotha shoshiponga she osha thikama peni. Ishewe, omukiintu nguka ota ti olutu lwe olu li muuyehame uunene oshoka oondohotola koshipangelo shaShakati anuwa odha nyengwa oku mu kutha oshitenda shoka dhe mu tulile mokugulu konima yoshiponga.
Mbengela okwa ti oondohotola odhe mu tanda lwiikando iyali opo dhi kuthe mo oshitenda shoka ashike iikando ayihe oha hulile muunyengwi, anuwa odha ti ka puna iilongitho ta yi vulu oku kutha mo oshitenda shoka. Anuwa Mbengela okwa tindi oku tandwa lwoshikando oshititatu oshoka oshilalo shetando etiyali ina shi aluka natango.
Yina yaMbengela Saima Theofelus okwa ti omwanakadhona okwali ha longo onga ootutonateli gwomaliko, nokwa lyatwa pethimbo a li miilonga.
“Anuwa okwa lyatwa kokanona ka li ta ka hingi ohauto yahe, kali taka revesa taka zi mo hotela yoAfrikan Stadt Haus Hotel moka hamu longele Dorkas. Dorkas okwa li a kuuntumba, ohauto ine yi monena po. Mbono ye mu lyata ina ya ninga nande onkambadhala yasha yo ku kwathela,” yi na ta hokolola
“Ndohotola okwa ti ina ndi enda iinano iile nenge ndi longe iilonga iidhigu oshoka itandi aluka mbala ashike ka ndi nkee, oha ndi ende kehe esiku oku ya no ku za kiilonga opo ndi kwathele uunona wandje uyali. Ngashingeyi okugulu kwandje ota ku ehama ko oha ku zindi ethimbo nethimbo,” Mbengela ta ti.
Omunambelewa omukuluntu moshikondo shuuhaku nonkalonawa Ben Nangombe okwa ti uuyelele wuna sha noshiningwanima shoka kali ewu shi, nota pumbwa ethimbo opo a popya noondohotola ndhoka dha tanda Mbengela ye a uve kutya oshike naanaa shi li po.
Omupopiliko gwopolisi moshitopolwa shaShana Frieda Shikole okwa ti oshipotha inashi ya natango kompangu, ta ti opu na iipotha oyindji yolundji nda ndjoka ya za nale ashike ina yi ya kompangu sigo oompaka.