Auleria Wakudumo
Omupopiliko wopolifi yaNamibia Deputy Commisioner Kauna Shikwambi okwa ti okavideo oko taka tambulafanwa komalungula ke na omunadolongo ta dengwa kuvakwao, kake na oukwashili, ashike oshinyandwa tashi danwa kovanadolongo, opo va kengelele ofamili ‘yoshihakanwa’.
Otaku hokololwa ovanadolongo va tuma okavideo kovakwanedimo vaDavid Kenaihe, nova pula opo va futwe N$1 000 vo va ha dengwe vali Kaiheha.
Vati ovakanedimo ngeenge ova yandje oshimaliwa osho tashi pulwa, Kenaihe vati ita dengwa vali notaka kufwa mo mokanduda omo eli ta monifwa oixuna neenghono.
Opolifi moku mona okavideo oko vati oya ninga omakonaakono omoule opo i mone oukwashili.
‘Nakuningwa oshihakanwa’ okwa twalwa koshipangelo opo aka ningilwe omakonaakono omoule ashike ndokotola wopaunamiti oo e mu hakula okwa kwashilipaleka kutya okuli nawa.
“Kali a mona oshiponga nande osha sha kombada ile koilyo yaye yomeni. Okwa pulwa yoo kovakonaakoni nokwa holola kutya ove ya po noshinyandwa ndele tava tumu okavideo kovakwanedimo vanakuningwa oshihakanwa nelalakano lokupula oshimaliwa kuvo,” Shikwambi ta ti.
Opolifi oya ti otai ningile omapekaapeko aveshe ovo va kufa ombinga moshinima omo, noku tala kutya osha enda ngahelipi opo ongodi i vakelewe modolongo.
Kenaihe okwa kwatelwe po oshivike shadja ko vati a denga noku dipaa Maurtius Tjivinda nekende mOlomakaya lomafiku 30 Novemba neudo.