Rosalia Johannes weedula 39 okwe lifutila modolongo noN$2 000 konima eshi kwa li a kwatwa po shaashi vati a kengelela po eengobe domukulupe weedula 83.
Otaku hokololwa Omukainhu ou omunangeshefa ha landifa okapana nombelela yongobe momatala mEenhana vati a patululilwa oshibofa shekengelelo shaashi vati ine liufa keudafano vali ve litula po nomukulupe oo e li yoo omunafaalama.
Vati okwa li a landa eengobe mbali momudo 2018 nokulombwela omunafaalama kutya ota futu oshimaliwa shaye mefimbo lixupi ngeenge okwa landifa okapana nombelela.
Okudja opo vati Johannes okwa futa ko ashike oN$2 950 koN$14 000 oo vali va udafana.
Onghee naashi osha eta opo omukulupe a lopotele opolifi fiyo omukainhu ta kwatwa po.
Johannes okwa holoka momhangu yamengestalata wEenhana onghela.
Oshibofa shaye osha undulilwa komafiku 11 Januali 2024 nomakonakono opolifi otaa twikile.
Omukulunhu koshikondo shokukonakona oimbuluma moshitukulu shaHangwena, omupedu Commissioner Zachariah Amakali okwa koleka oshibofa eshi.