OIPAPAKANE – Elizabeth Joseph (43) ou a tetwa okuulu nokaoko konima eshi a lika keyoka ota pula ekwafo moshiwana opo shi mu yambidide oku mu tungila onduda yokunangala yoshipeleki.
“Onduda yange otai hale okuwapo. Ngeenge odula tai loko monduda ohamu talama omeva. Kombete ohaku kala kwa tuta,” ta ti. Pefimbo Kundana a talela po Joseph keumbo lavo komukunda Oipapakane moshitukulwa shaHangwena, okwa ti oku na omhito yokuwilwa konduda molwaashi oihati neengudi oda lika keehedi.
Omavalulilo ombaanga yaye Elizabeth Nghiwewelekwa 64280987157 FNB, ongodi yaye 0816296167. Omukainhu ou okwa hokolola ta ti okwa lika keyoka lwoikando ivali momudo 2015 pefimbo kwa li koilonga noshoyo momudo 2021 alikila meumbo lavo efimbo lomatango. “Onda kwatwa komhepo yoku li mangeleka molwashi paife kandi na vali ombili yokomwenyo. Ohandi kala ashike meumbo ndihe na omukwafi ngeenge ounona vaye kofikola. Ihandi kofa vali molwashi ohandi nangala handi vele mokuulu, handi pi. Ohandi kala handi di omainyo komadi,” ta ti.
Okwa hokolola ta ti okwa lika pefimbo kwa li ha longele ehangano loWilko Recycling mOhangwena.
Ehangano loWilko Recyling ehangano ha li longo lokulongulula oitenda neendoxa nomakenda.
“Onda hangika handi toola eendoxa odo kwa li ndi li ondumba koshi yomuti. Onda unda ashike eshi handi di omaxwilili keenyala mboli onda lika keyoka,” ta ti.
Okwa ti okudja opo ovanailonga vakwao novakwashiwana ova dipaa eyoka nokonima ove li xwika po, omanga eyoka olo le mulya momudo 2021 ina li dipawa molwashi vati ola faduka po.
Joseph okwa ti oku na ounona vane, hadi navo meumbo noshoyo ounona vatatu va dalwa kuvamwaina navo hava di meumbo tuu omo. Okwa ti nonande a pewa oshimaliwa shopendjela okudilila kepangelo, ina shiwana oku li kwafela meumbo. Okwa weda po ta ti moshimaliwa shopondjela omo ha lande oikulya nokulongifa koshipangelo.