Auleria Wakudumo

Omulumenhu weedula 49 oo ha longo ongomuwapaleki koHenning Crusher mOndangwa okwa li vati e na okushaina ehandukilo laxuuninwa oshoyo okutewatewa moilonga Etitano. Oshiningwanima osha ningilwa pofitola Henning Crusher moOlunho mOndangwa, Etitano potundi 12h30. 

Omupopiliko wopolifi moshitukulwa shaShana, Chief Inspector Thomas Aiyambo okwa ti vati omufekelwa okwa dja koTsumeb Henning Crusher a tuminwa kofitola yokOndangwa molwomalihumbato mai moilonga. 

Aiyambo okwa ti vati nomOndangwa, omufekelwa okwa twikila okulihumbata nai moilonga oikando ihapu nokwa li e na okushaina ehandukilo laxuuninwa osho yo okutewa moilonga. 

Vati omufekelwa okwa ifanwa kombelewa a ka shaine ngeno, ashike okwa dika eenyala medu. Okwa fiya po vati ombelewa nokonima yefimbo okwa alukila vati poilonga e na ombistoli. 

Aiyambo okwa ti omufekelwa okwa yasha ovanghona vaye. Umwe opo a xulifila opo, naumwe okwa twalwa koshipangelo shopaumwene kOndangwa. 

Konima vati omufekelwa okwa shinga po okafangufangu kanakufya ndele ta shingi fiyo okopolifi e ke lilopota yee mwene. 

Aiyambo okwa ti omufekelwa okwa tulwa mokalimosho pefimbo opo. 

Ombistoli yo 7,65 milimeta oyo ya longifwa komufekelwa nayo oya kwatwa ko kopolifi. 

Nakufya okwa li oproduction manager koHenning Crusher. 

-wakudumoauleria@gmail.com