Kutunda tupu mwaSiwogedi 2024, Namibia na China malizuvho gawo gomarandesero kuna kara nye po N$19 billion (US$1.1billion) mukarelipo gosirongo saChina moNamibia, Zhao Weiping yimo ana kutanta ngoso. 

Apa nye kahuyungire kovanambudi moune kaupitire, age katente asi Uranium account zazo kuna wapa kupitakana noaccount nonkwawo. 

Age katente asi China uholi wendi kuna kara asi gahepa kugusa yakara moyirongo yaAfrica atware kochina ano dogoro ngesi awo nare vatameka kutwara nyama zitunde moNamibia zize kochina ano ngesi vana gwedako nye nyama zonzwi. 

Yimwe eyi vana kugazara vagwedeko yimwe eyi yina kara simpe monzogera navavhura kutuma koChina ngwendi mandjembere, mangara nayimwe ngwendi yomomema. 

Kapi pana kara udigu unene poupolotika asi ngano vaha gusa runone rwaNamibia vatware koChina kupitira omu yawapera. 

Kuna kara po tupu udigu wongendeseso pamberewa …. Nsene asi mapangero getu navayimana  oyo yonongendeseso hawe kuna kumoneka asi ose ngano tatu tura nye malizuvho paveta gomarandesero komeho oko. 

Age kayinkondopekere asi pepongo lyakereko moBejiing mo 4-6 September 2024, sigongi pokatji kaPresidente gwaChina Xi Jiping ntani Presidente gwaNamibia Nangolo Mbumba, China kwatente asi age nakagavako yimaliwa yokusika koN$ 50 million yokuyavatera vantu kon ondja, morwa rukukutu nye oru runa kara asi kuna kumusirongo saNamibia mwaza nonyuku. 

Posigongi sooso, age kwatente asi China ana tokora kugava kwaNamibia yimaliwa yokupira kutengwida yina siki ko N$500 million konoprojeka odo dina kuwizako. 

‘’ Mokutara nye yokomeho, ame nina hafa asi hawe kuna kara po malizuvho gomawa pokatji kaChina naNamibia mokuruganena kumwe. 

Unene po natutamununa nye malikwamo eli lyokuruganena kumwe, eli nalikara nye momaruha gomanzi ngwendi asi nondima, matungo, erongo, unkurungu, marunone ntani marutjeno,’’ yimo ana kutanta mukarelipo gosirongo saChina. –Nampa