Namdebs ge !âǀhuru-aon ǀkha ǀhûǁare hâse Sîsenǁareǁkhāǁkhāsensa !Namiǂnûs !nâ Surigu ai !Gao!gaosa ǂKhawadīb Dīǀgauga Mûǂams !aroma ge ūhâ i. Nē sîsenǁareǁkhāǁkhāsens ge !ās !nâ nē ǂkhawadība ra !khamǂuitsâ ǁaxasiga ǀgaiǀgais ase ge dīhe hâ i. 

ǂHôamāǂui-i !nâs ge Namdebsa ge mî, surigu ai !gao!gaosa ǂkhawadīb ǁnaetisa mâsib ase īsa tsîn ǁîna ǁkhān a-i hoa-i ǀkha nē mâsib ǂnamipe ǀhûhâsiba nî gowaǀîsa. 

“Sîsenǁareǁkhāǁkhāsens di ǁgūbas ge !nāsa !gāsasiba hōsa, taren ra !aroma tsî mâtikō ǀnōb !nâs nēsa ǁKharas ǀkharib !nâ ra īsa, !gōsase !Garibams !nâ. 

Nēs ge ǁkhāti ǀnai nē mâsib !nâ huis !aroma hâ !oabade ǂanǂui tsî !nubusin Surigu ai !Gao!gaosa ǂKhawadīb ǂnamipe hâ ǂkhâ!nâdi hîan nēs !nâ ra ǂkhôadīhe khoena ra !khō!oan xa nî ǂanǂuisa oresa hōs !gao. Nēs xōǀkhās ge sîsenǁareǁkhāǁkhāsensa hâ a huigu mâti a sîsenūhe ǁkhās, ǀnai hâ dīǀgaugu !nâs tsîna gere ǁguiǂui,” tis ge Namdebs Pauline Thomas, ǂnûiǂgās ǁhōn tsî taniǀgaras ūhâ sîsenǂuib disa gere mî. 

“ǁÎs ge ǀaro tsî ge mî “Sida ge !ereamxasiba tani hâ, Surigu ai !Gao!gaosa ǂKhawadīb ǂnamipe hōhō!nâde ūhâ tsî ǁgau!nâsa khoena māsa, tsî ǁawoǁawosa mâ khoe-i hoa-i nî !norasase tsî ǂkhâ!nâhe rase tsâse.” 

ǁKhā ǁaxasib tawab ge nē sîsenǁareǁkhāǁkhāsens !khōdana-aob, James Itanaba ǁhao-aona ge mîba, nausab ǀgaisa ǁgoaǂuis ǂâiǂhansensa ǀhûhâsigu !nâ Surigu ai !Gao!gaosa ǂKhawadīb ǂnamipe ra hā-ūsa hâ, xawes mâ ǂkhari dītsâs hîa ǀhûhâsiga hōhō!nâs, sîsenǁareb tsî dā!harode ūs disa ǁanǂgāsabena ra ǀgūǀgū !khaisa, ǀhûhâsib !norasasib tsî ǀguitikōsib !nâ a mûsasa. 

Nē sîsenǁareb tsî !khōǁôagus !nâ-ūb ge ǀhûhâsiba ǁnā ǂkhôadīxa!nâ tsî ra ûiga tsâǀkhā mâsiga a khôa!ā -ǁkhā, nau ǀkhāb ai !gâi tama tsî ǀhûhâsigu !nâ ū!oasa tama ǂūsi tanisendi tsî dīǀgaugu hîa ǂkhawadība ra ai!gû kai -ǁaxasin ǀkha ra ǂkhâ!nâhen ge ǀhûhâsigu !nâ !khai-e ūhâ tama hâ. 

ǀGuipa ǀhûhâsib khoena mā tsî ǀgui domma xu !khams ge ǂkhâ!nâs hâsa nē ra ǂkhôadīhe tsî tsûtsûhe khoena ra mā tsî !âubasens ǀkharaǀkharasib nî hâs dis tsîna.