ONAUSHE – Aavali mboka haya menekele oondingosho dhotombo, unene aayelele, oya popi kutya onkalo yokwaana iilonga oye ya shololitha okusila oshimpwiyu aanona yawo, mboka nayo paife haya taambathana nayo omahalasa gotombo.
Aanona ye li kohi yomimvo omulongo, momikunda ngaashi Omapopo, Onaushe, Ehafo lyaKandenge nOnkani, moshikandjohogololo shUuvudhiya, oya kwatwa kokonkalo yotombo, nokuthiga po oshowo okufaula oosikola.
Uupyakandhi mboka kau li ashike momikunda ndhoka dha zi noku tumbulwa, ihe otau hokololwa wo kiitopolwa yilwe, hoka ku na unene aayelele.
Mbaala Stefanus, omuyelele gwomokunda Ehafo lyaKandenge okwa popi kutya ita vulu okuthindila aanona ye kosikola oshoka ke na shoka teya tulile muuabaki, nolwindji ohaya ka kotha nomapunda kaagena sha, ngele inaya nwa otombo.
Stefanus oha zi nomukulukandhi gwe, naanona yawo yahamano.
“Ngele otombo oyina uupyakandhi, inandi wu mona natango, aanona yandje ngele oyanu otombo, ihaya nyenyeta we ondjala,’’ ta popi ngaaka.
Ta hokolola kutya, mongaashingeyi oonkalamwenyo ye naakwanezimo ye, oya ikolelela motombo ashike, oshoka kena shoka ha ningi kashishi okunwa otombo.
“Ohandi penduka ongula pohamano, tandiyi tukiithigile mo mehalasa lyotombo nokuume kandje, mboka hatu tsakanene nayo omanga omukulukandhi gwandje ta landula ko naanona mboka esiku ndyoka inaaya ya kosikola,’’ Stefanus ta popi ngaaka.
Ta ti, iha mono omwendhi sho hagu piti po, ohuuvu ashike aantu taya popi kutya ngula oDesemba, oshoka iha yalula omasiku.
“Otandi kala ndishi omasiku tandi ga longitha shike? ngele kandina mpoka thandiyi, ka kele ko kunwa otombo, noku shuna kegumbo po22h00,” ta popi ngaaka. Okanona komimvo 10, hoka ka li puundunda tau ithanwa Omatala, moonkundathana nomutooli nkundana nguka okwa ti, kosikola okiihula ko nale, ihe ka keshi kutya uunake. “Ihandi yi kosikola oshoka kandina sha sho kulya. Ondeya kuundunda nameme opo ndiye ndi nwemo mo motombo, ngame ndi shune kegumbo nokamwameme hoka okashona omanga meme taya kala po na tate,” okanona ka popi ngaaka.
Veronika Petrus ngoka naye a li esiku ndyoka eya okunwa mo motombo, okwa ti, onkalo ndyoka oyindji momukunda gwawo, aanona yaayelele oya simaneka okunwa otombo, shi vulithe okuya koskola.
“Aanona yaayelele ohaya thigi po oosikola mbala, omolwa onkalo momagumbo gawo, mwa kwatelwa ondjala,’’ ta popi ngaaka.
Ta ti, aayelele yamwe ye li me kwatathano lyopahole, ohaya kala ashike taya dhengathana, naanona yawo ya tala ko, omolwa oluhepo niikolitha. Tapopi ta ti, aakulukandhi ihaya kala yena noluvalo lwawo, ohaya thindi ashike aanona yawo otombo.
“Nonando aanona inaya ya kosikola, kaye wete pena epuko nando oshoka kaye uviteko kutya elongo oshike,’’ ta popi ngaaka.
aakuthimbinga poondunda ndhoka ndomanwiino, momukunda Ehafo Lyakandenge otaya ti, osheetithi oshinene shelongithonayi lyiikolitha ngaashi otombo koombinga dhawo onkalo yomadhiladhilo ga vundakana oshowo ompumbwe okudhenga po ondjala. “Okunwa otombo mehalasa hali kotha ashike oondola ntano ohashi kutitha epunda lyomuntu kombiliha oshowo aantu ohaya dhimbwa nuupu omaupyakadhi gawo,” osho yamwe yali puundunda taya popi ngaaka.
Ta ya popi kutya ekwatathano lya nkundipala pokati kaaleli momikunda, miikandjohogololo oshowo miitopolwa ohashi vulu wo okweetitha onkalo yoluhepo, oshoka aaleli oye yena oshinakugwanithwa sho kweetitha omapendulopo mokati kaalelwa yawo, pakushilipaleka kutya oompumbwe dhaakwashigwana odha kundathanwa noku tulwa miilonga.
Aakuthimbinga natango otaya ulike omutanganwe kaaleli sho taya ndopa okugandja omalongo momikunda shoka ye shi tala ko omukundu omunene tagu etitha aanona ya kanithe ombepo ye yi longo, oshoka kapena epukululo okuza kaakuluntu.
Aakwashigwana mboka ya pulapulwa otaya ti, oyendji yomaathigona oyo mboka ye na ondondo yelongo lyopevi noonkondo nenge mboka inaya mona elongo nando nando.
“Shika ohashi ya yi moshipala okumona iilonga nenge okukala nomaunongo nowino yokwiimonena oompito dhiilonga nenge okulonga kuyoyene,” aanamukanda ya gwedha po ngaaka.
Oya gwe dhwapo kutya aayelele oyo iihakanwa yotombo, no ngele okwa ningwa omwaalu tagu pula aayelele ya mana oosikola, otashi ka kumitha oyendji.
Onkene omanga kwandhindhilikwa uunkindi wawo melongo, epangelo na li kale ta li yambindhindha aayelele, okugandja iilonga ihaayi pula opena nombaapila.
Kansela gwoshikandjohogololo shUvudhiya Timoteus Shivute okwa ti, onkalo yaanona taya thigi po oosikola oshowo taya faula, ohaye yi lopotelwa aluhe.
“Out li mekwatathano noosikola ndha yooloka moshikandjohogololo, ndhoka tandhi longo nuundhiginini okukandula po uupyakandhi mboka kaa u holoke.
Ta ti, pombelewa ye yoshikandjogololo, opena omuniilonga guuministeli wokakwakwashike kookantu, ngoka haka kandula po uupyakandhi mboka uuna ewu lopotelwa koosikola.
‘’Onkalo ndyoka unene otwa ndhindhilike kutya ohayi etwa kaakuluntu, mboka itaaya sile aanona yawo oshimpwiyu, omanga ya pikwa kiikolitha,’’ ta popi ngaaka.
Shivute okwa ti, ombelewa ye, otayi tsikile okulonga nuundhiginini oku totha mo iipotha yolundhi ndyoka noku yikandula po.
Okwa kumagidha wo aakaluntu ya simaneke elongo, oshowo okukumagidha oyana ya tule elongo komeho.
‘’Oshilongo shaana aantu ya longwa, ihashi humukomeho,’’ ta ti ngaaka. vkaapanda@nepc,com.na