Omupresidente Netumbo Nandi- Ndaitwah okwa ti oya taamba ko eyindilo lyaIndia opo e ye po nomahala gokunduluka iikwamiti moNamibia. 

Nandi-Ndaitwah ndhoka okwe dhi popi sho a li ta kundathana nomutse gwoshilongo gwaIndia, omuprimaminista Narendra Modi ngoka a talele po Namibia ohela. 

“Edhiladhilo ndyoka otali ka hwepopaleka onkalo yuuhaku moshilongo, shoka natango tashi tsu kumwe nomalalakano gepangelo lyaNamibia okunkondopaleka uuhaku moshilongo,” omushangwa gwa lesha ngaaka. 

Ta ti, ngashiingeyi oya tegelela ashike okushayina etsokumwe muuhaku. Omutse gwoshilongo Nandi-Ndiatwah natango okwa totha mo kutya India natango okwa indile opo ye ye po nosenda tayi ithanwa Namibia-India ndyoka tayi kala yi na sha nomangeshefelo, nelalakano lyokukandula po okwaa na iilongo unene mokati kaanyasha. 

Sha ikolela kombalewa yOmupresidente elalakano lyaModi okutalela po Namibia okukundathana naNandi – Ndaitwah nkene ye na okukandula po omaupyakadhi ga taalela iilongo yawo, nankene ye na okuhuma komeho. Presidente Nandi- Ndaitwah nOmuprimaminista Modi oya kundathana nok dhimbulukithathana uukumwe wa kola wu li pokati kawo osho wo ondjokonona yawo sigo oompaka ya thikama nena. 

Oya thindi wo omuthindo nkene ye na oku shi enda okupitila meuvathanotsokumwe ya tula po opo ya kandule po omaupyakadhi ga taalela iilongo mbika iyali. 

Natango oya kundathana wo kombinga yooprograma dhilwe ndhoka tadhi kandula po omaupyakadhi gokwaana iilonga noluhepo, uupyakadhi mboka wa taalela iilongo ayihe iyali. 

Modi okwa uvaneke wo okuya a ka talela po ewendo lyOmukokoli presidente gwoshilongo Sam Nujoma koHeroes Acre. 

Omupresidente Nandi- Ndaitwah nkene a yile koshipundi okwa kala nokutalela po iilongo yaAfrica okunkondopaleka uukumwe wawo nokukundathana nkene ye na okulonga nokuhuma komeho. -vkaapanda@nepc.com.na