Auleria Wakudumo 

Namibia okwa ninga eumbo lovaliyambi Ovaamerica ovo tave liyambe ongovakalekipo vombili hano oPeace Corps”. Zach Scott oo ha ifanwa paife Tuhafeni naCorrine Scott ‘Nelao’ ohava kwafele okuyambidida eeprograma dovanyasha, enghonopaleko leliko loshilongo osho yo oikwamhungu youhaku. Ova ti ove udite etumba nowuumbo okukala moNamibia. 

“Okukala monooli yaNamibia okwe tu longa okukwatafana novanhu nokulihonga omufyuululwakalo wOvawambo. Keshe efiku ohatu lihongo oshinima shipe, kutya nee okukwafela ovanyasha, okulihonga Oshikwanyama nokulonga ovanailonga pamwe naame kombinga yaAmerica,” Scott ta ti ngaho. 

Tuhafeni naNelao ova ti ova shambulwa unene kombili yoshiwana neyakulo olo hava pewa kovashiinda shavo. Tuhafeni naNelao eshi va fika moNamibia, ova shambulwa kelaka osho yo omufyuululwakalo wOvakwanyama. Ova ti ova hovela okulihonga oitya kooshimwe nooshimwe, tava hongwa kovashiinda osho yo ovanailonga pamwe navo. 

Ova hovela okukwata ouvidio ovo va andjakana komapandja opaungoba unene koTikTok. Kakele kouvidio vokomalungula, Scott okwa holola kutya ohava kwafele eeproyeka da yooloka okudja kwaadi dokukwafela ovanyasha, okunghonopaleka eliko osho yo eeprograma douhaku. 

Tuhafeni ohe liyambe okukwafela mouministeli wouhaku moshitukulwa shaHangwena omo ha kwafele ounona, okuyakula ounghundi wopamadilaadilo osho yo okukwafela okulonga noikumhungu yonghalamwenyo melongelokumwe noTeen Club noupangelo vanini omanga Nelao ha kwafele melelo loshitukulwa shEenhana omo he liyambe moipambele younangeshefa, okuyambula po eengeshefa dishona osho yo eeproyeka dokukwafela okuyambula po eliko loshilongo. Ovaamerica ava ova holola kutya Namibia okwe va longa ombili, elongelokumwe noukwawananghali moshiwana. Ova holola kutya otava twaalele ashishe osho ve lihonga moNamibia. “Otu udite etumba shaashi eeproyeka neeprograma adishe edi hatu longo nado otadi ende nawa. Ovanaudu osho yo ovanailonga pamwe nafye ohave tu yakula nombili nononghenda,” tava holola ngaho. 

Kakele keeproyeka neeprograma davo, Scott ohava kufa yo ombinga momudingonoko, okuwapaleka odoolopa osho yo omahongo a wedwa po moshiwana. 

-wakudumoauleria@gmail.com