Epangelo lyaSouth Korea olya yambidhidha Namibia nolwishi lwootona 4 896 okupitila mehangano lyoWorld Food Programme (WFP), ndyoka lyi lile po nohali kwashilipaleke kutya iigwana ya hangana otayi palutha aantu yawo.

Omuprima gwoshilongo Elijah Ngurare ngoka a li a taamba ko olwishi ndoka okwa ti, otalu ka topolwa miitopolwa ayihe yoshilongo, tali ka gandjwa kwaamboka taya pumbwa omayambidhidho giikulya.

“Otwa tengeneke Aanamibia ya thika po300 000 taya ka pewa olwishi ndoka. Elalakano okupalutha oshigwana shetu opo shi kale shi na uundjolowele,” ta ti ngaaka.

Ngurare okwa ti okwa pandula epangelo lyaKorea sho lyayambidhidha ngaaka. Ta ti, shoka otashi ulike uukumwe nombili osho wo ombili pokati kawo.“Korea okwa kala nokuyambidhidha Namibia. Okwa li natango a yambidhidha mokutunga omithima dhomeya miitopolwa Kunene, Omusati osho wo Erongo,” ta popi ngaaka. Omuprima okwa ti, iitopolwa mbyoka oyo yimwe ya tseyika nawa okunduluka iikulya noya ikolelela muunafaalama, onkene omeya oga simana noonkoondo okupungulwa. Ta ti, Namibia oshilongo shimwe shomiilongo yAfrika sha kala nokudhengwa koshikukuta omimvo dha zi ko omolwelunduluko lyonkalo yombepo. Omukalelelipo gwaKorea moNamibia Kwang-Jin Choi okwa ti oya gandja olwishi ndoka lwa ndulukwa koKorea nelalakano lwokuulika uukwawwanankali osho wo okunkondopaleka ombili nelongelokumwe okuza nkene oshilongo sha mangulukile.

“Korea okwa li a tungu uukumwe okuyambidhidha ehangano lyo-WHO okuza mo2018. Sigo oompaka okwa yambidhidha aantu ya thika poomilliona hetatu muuyuni niikulya, nena ota yambidhidha Namibia,” ta fatulula ngaaka.

Choi okwa gwedha ko kutya shika hasho oshikando shotango taya yambidhidha Namibia, ta ti ethimbo lyoCorona oya kala ye li mekwatathanao ewanawa.

-vkaapanda@nepc.com.na