Auleria Wakudumo
Ehangano lomandjebele, oNamibia Grape ola yandja oshipambuliko shotete sheemiliona N$10 koNational Youth Service (NYC) Etinhe ladja ko moWindhoek.
National Youth Service oi na mo oipambuliko mehangano loNamibia Grape Company.
MuNovemba 2024, ehangano lomandjebele ola tala po eudafano kutya otali ka longela kumwe nomahangano yooloka okondje yoshilongo okukala tali landifa omandjebele kuvo.
Mopaife, ehangano ola shaina eudafano nomahangano e fike po2045. Eudafano eli ola tulwa po okuxumifa komesho eliko loshilongo mokutwala omandjebele kondje yoshilongo shi dulife eshi hatu kufa kondje yoshilongo.
Onamibia Grape oyali yo tai ningi etalululo lomaudafano a tulwa po kuvo nomahangano a wedwa po ngaashi oNational Youth Service namakwao.
Omunashipundi wehangano lomandjebele, Richwell Lukonga okwa holola kutya elalakano lokutalulula eudafano oku uda omakemo omahangano oo ta longele kumwe nao.
“Omahangano okwa udafana kutya oNamibia Grape Company oitai mono ouwene wongeshefa weepelesenda 51 omanga oCapespan ina eepelesenda 49. Eshi otashi pitike opo omahangano aeshe a ninge omatokolo e fike pamwe oshoyo okutukulilafana oipambuliko ili nwawa,” Lukonga ta ti.
Ta popi ponele yomunashipundi woNYC, Tobias Nambala okwa holola kutya ehangano lomandjebele ola pewa oNational Youth Service muOctoba 2021 okuyambula po eliko loshilongo.
“Oipambuliko ei twa pewa nena otai ka longifwa okuyambula po eemhumbwe di hapu dovanyasha. Ohatu ka yandja omadeulo kovanyasha veli 1 000. NYS ota kutu ovanyasha oikando ya hanga po16 paife. Ovanyasha 750 ova pewa omadeulo mokunduluka oinima, okutota eengeshefa eedula da ya,” Nambala ta ti.
Nambala okwa ti oshimaliwa shimwe otashi ka longifwa okuyambula po ounamapya ounaimuna moshilongo.
“Ounamapya nounaimuna otau ka yandja oilonga kovanyasha, vamwe otava ka kutwa pakafimbo okudja koiputudilo ya yooloka,” Nambala ta ti.
Omupedunashipundi wehangano loNamibia Grape Nangula Shailemo okwa holola olupandu komahangano oo a waimina ehangano lomandjebele opo li dule okuuya po noipambuliko ya wana.
“Oipambuliko ya yandjwa koNYC oshili shotete moipambuliko ihapu tai ka shikula ko. Esho otashi ulike kutya ehangano otali ka kwafela Ovanamibia vahapu,” Shailemo ta ti.