OPUWO – Aakalimo mOshitopolwa shaKunene, unene aahondji yoonguwo oya li ya ithanwa koonkundanthana opo ya kundathane shi na sha noku eta po omizalo dhosikola. Oshiitanene shika osha ningilwa kOpuwo naMinista gwopevi muuministeli gwiipindi nomayambulepo gaanangeshefa aashona, Lucia Iipumbu.
Koshiithanene shoka sha ningilwa koombelewa dhuuhaku dhopashitopolwa shaKunene mOpuwo, Iipumbu okwa ti opo ku kondjithwe nokushunithwe pohi omwaalu gwokwaana iilonga moshilongo, okabinete oka kutha etokolo opo ka hulithe po okweeta moshilongo omizalo dhoosikola dhepengalo nosho wo omizalo dhaapangi oku za kondje yiilongo. Shika ota shi ningwa nelalakano oku eta po oompito dhiilonga moshilongo.
Ta ti oshinima shika otashi ka ningwa moshilongo ashihe, nepangelo otali ka ninga kehe shoka tali vulu oku ninga opo oku shunitha pevi oondando dhiiyata mbyoka tayi etwa moshilongo.
Aahondji otaya ka mona omadhewo opo ya adhe iinima mbyoka ya pumbiwa kepangelo lyaNamibia ngele taya hondjo lyo ndele hakiipumbiwa yomizalo yekepangelo lyaSouth Africa.
“Omizalo dhaalongwa otadhi ka kala dhi ikolelela komilandu dhaNamibia ashike hadha South Africa,” Iipumbu ta ti.
Minista nguka gwopevi ta ti oku eta mo omizalo dhosikola moshilongo itaku ki idhidhimikilwa we muule woomvula mbali komeho oshoka oshilongo oshi na kehe shoka tashi pumbiwa oku hondja omizalo ndhoka.
Ta ti mongashingeyi Namibia okwi kolelela koongeshefa dhiizalomwa dhaSouth Africa oku landa omizalo dhosikola, ashike otadhi vulu oku landwa kondado yi li pevi koongeshef dhaaNamibia.
“Pomumvo 2030, Namibia otaka kala oshilongo shi ithikamena kusho shene no itashi ka kala shi ikolelela kiilongo iikwao oku eta po iinima mbyoka tatu vulu okueta po po tse yene. Ashike opo shika shi ningwe, atuhe ota tu pumbwa okulongela kumwe onga ongudu yimwe,” ta ti ngaaka.
Aahondji yomoshilongo oya tambula ko oshietwa po shika taya ti epangelo olya eta edhiladhilo ewanawa oshoka otali ka tidha omukundu gwokwaa ha na iilonga moshilongo.