MoVenduka-Uministeli woyirugana nomagwanekero kavabubukire valipopere vene konombudi edi kadizuvhayikire asi awo kwaza kosirongosa Canada, omu vakakondjera asi uministeli wetu ugwane nawo evango mombunga ezi vana kutumbura asi (ICAO). Uministeli kwafuta N$773 138 eyi vana kutanta asi yoyikoverero ndi asi mudwaro ano yimwe kayikere yokulivatera nayo morugendo.
Vantu ava tuna kuuyunga kuna kara murongo,yimaliwa nayinye kuna kara N$847 138,apa kava vapere sikasete esi ngasi gava mulyo kwanavenye, kuna kumoneka asi oru yiro rugendo runa pura epangero yimaliwa yoyinzi. Awo kwakere negano asi vature epongo omu navayagava kovanambudi asi yinke yakahoroka nye ministera kwayatokora tupu kugava mbudi ezi konosayitunga edi ana kugazara mwene ano dimwe kwadisiga. Apa kauuyungisire vanambudi ava hamutjanga gokukarereramo mouministeli wina Shihaleni Ndjaba katente asi mukoso gosikasete kwavapura N$69 000, kapisi N$80 000 kukwama omu vayitanta pwanare ano ezi N$5 000, kwazitulire zivatere rugendo kapisi N$30 000, kukwama omu vayigeve pwanare.
Uministeli kwaruganesa yimaliwa eyi ngwendi ngesi N$80 087, kovantu vane, N$119 983 kwaministera, N$105 625, kwaBethuel Mujetenga mugendesikurona mouministeli wina,ano Ndjaba hamutjanga gokukarereramo mouministeli kwagwana N$84 522. Vantu vamwe kwatanta asi vantu ava vakere morugendo oru vamwe kwakere wokukagava tupu yimbapira siruwo oso womulyo vana vasigi. Age yiyo katente asi ministeli zakara nononkondo mokutara asi ngano yilye navhura kuza. Nampili ngomu yakere asi yimaliwa eyi yinzi unene ndi asi vavapa marondoro asi vagendese nawa yimaliwa oyo vana kugwana. Nye simpe yiwo vana kara nononkondo mokutokora asi ngapi navayiruganesa yimaliwa oyo. Uministeli kautente asi epongo eli mulyo unene, alyo hena kuna kara asi pontambo zokuzeruka zouzuni. Mokutaranye eyi varuganesa, kokasete uministeli ngano kwapura tupu kasete aka konoministeli ngwendi wonongesefa ntani wovadinguli.
Ndjaba yiyo kalimbwilireko asi awo vatuliremo matjingiso nye valizira kwato kapi vagwana elimbururo.
Vantu nye ava vana kutanta asi awo varugani tupu vahana kudivako yuma age katente asi hawe owo vantu owo kwakavaruganesa mokutarera mahoroworo ntani nongendeseso dimwe ngoso dopamberewa. Ame nahepa kumutantera asi vantu ava twaza nawo vakarugana sirugana sosinene, monombapira ntani mokugendesa mahoroworo.Mokuvaninka asi awo kwakakere tupu kwina mokugavera yimbapira hawe oyo kapisi usili, awo vana kutanta oyo ntudi yiwo vana yidiva, ntani hena ntudi vaava vananyenge rugendo oru. Vantu kapi vazire asi ngano vakahingire tupu nye vahepa kukagendesa nomberewa edi dakakerepo dokukwateramo da(ICAO), yimo ana kutanta hamutjanga gokukarereramo.
Moomu vana kuvhukamo vantu veni yimo hena muna kugwana uwa ndi yirugana yeni nayo ngorooro yina kugendapo nawa.Kepuro nye asi morwa sinke vagusilire mugendesi gona koruha rovarugani Esther Kaapanda vahana kugusa hamutjangagona, Willy Kauaria, age katente asi muntu ogu twagusa nage kwakarugana sirugana sosinene, unene mokupapara mazwi kovaArab ava gadiva unene neraka lyawo age kuuyunga, ntani hena age kuuyunga ruFranch noudivi ou gakara nawo nye.Ava vana kuyirwanesa kavapatanene asi oyo kapisi usili morwa neyi vaza ngoso yininke nare yatameka.Kwato yokukapapara mazwi yimo ana kutanta gumwe ogu ana pilire kuhara kugava edina lyendi. Ano hamutjanga age asi ngano kapi katukarugene ngano kapi katukagwene evango nampili limwe, eyi yina kumoneka asi ose katu kagwene 86 omu vayigazara asi SADC ngano gahepa kugwana 14, mokukara muhameni.
Tara tupu yirongo kayikere 17, nye mavango aga vana kukondjera kuna kara tupu 13, nye yinke Namibia kakawizire gwauvali kwaTunisia,nomazwi 37, yina kumoneka asi katu karugene. Vamwe ava kavakere tava kondjere evango kavakere vaKorea, Tunisia, Ghana,Indonesia, Malayisia, United Arab Emirates ntani El Salvador nayimwe ngoso.
Eyi kuna kumoneka asi kapi kayiwepe name nyamwange nina kara asi nyame mufili sinka yininke yoministeli pamberewa nikakare kepongo lyangesi ndi asi natuvenye naministera ogu ana karerepo epangero paupolitika tuka kare pepongo lyangesi yimo ana kutanta Ndjaba.Sigendo saNamibia kuna kuliza nawa-nawa nomuvaru ogu vapura gokusika ko1435, vamwe owo vawizako kavakere vanasiki ko48, 40, 33, 30, 27.
Namibia ngesi kuna kugwana yimaliwa yina siki konomiliyuna 48, mwankenye kwedi kugwana nomiliyuna 4,ntani hena ngesi kuna kugwa uwa kosirongo saAmerika omu vagavako yimaliwa yina siki konomiliyuna daAmerika 400, vakalirongeseko ntani uwa umwe kuna kutunda kombunga ezi vana kutumbura asi Afrika by China.