Okanona komimvo mbali oko kamwe komwaamboka ya kwatwa koonkondo mehuulilo shiwike.
Opolisi oya lopota iipotha yathika pomulongo yaantu ya kwatwa koonkondo moshilongo mehuulilo shiwike.
Sha ikolelela kepeko lyopolisi lyiiningwanima ya holoka mehuulilo shiwike, okanona komimvo mbali okakwatwa koonkondo komulumentu eshiwike, sho kali kathigwa megumbo oko akeke ka kotha.
Oshiningwanima shoka anuwa osha holoka momundhingoloko Epako koGobabis Olyomakaya.
Otaku hokololwa kutya aakuluntu yokanona hoka oyali ya zi mo megumbo yathiga okanona ka kotha, nokonima yethimbo okanona komimvo 13 okali kayi megumbo sho kaadha omulumentu ngoka ta longele okamwayina omuyonena.
Okanona hoka anuwa okali kashuna noku katseyithila aakuluntu mbala.
Naku fekelwa okwa matuka po, ihe opolisi oyili metifa okulukonga opo a dhitikwe.
Opolisi moshitopolwa shaShana oya lopota okanona komimvo heyali hoka anuwa ka kala nokukwatwa koonkondo komulumentu gwomimvo 17 okuza omumvo 2020 ihe opo sha lopotwa oshiwike sha zi ko.
Nonando okanona hoka anuwa ka kala noku lopota ku hekulu kutya otaka luluma noku za ombinzi puukiintu, inaka falwa koshipangelo ihe oka kala nokulombwelwa kutya naka ikohe nomongwa.
Omulumentu ngoka ina mangwa po natango nomakonakono gopolisi ogeli metifa.
Okanona komimvo 12 anuwa okakwatwa koonkondo omanga kwali taka tyaya iikuni, komulumentu keeshiwike.
Oshiningwanima anuwa osha holoka momukunda Ekolyanaambo.
Otaku hokololwa kutya okanona hoka okali pamwe nokakwawo, sho omulumentu ngoka a kwata okanona hoka ye ta tidha po okanona hoka kali nokakwawo.
Anuwa okwa lombwele okanona hoka kiihule omanga inee ka dhipaga, eteka kwatakoonkondo.
Moshitopolwa shaShana natango omwa lopotwa omukiintu gwomimvo 18 ngoka a nuwa a kwatwa koonkondo kaalumentu yatatu sho kwali ta zi kokapale kemanguluko mOshakati.
Omupevi kuluntu gwopolisi moshitopolwa shaShana Frederick Ndjadila okwa ti oshiningwanima osha holoka kokapale koondhila nale mOshakati uusiku.
Otaku hokolwa kutya omukiintu ngoka okwa ponokelwa kaalumentu yatatu ya zi mohauto ndyoka yali miihwa, eta ye mu kwatakoonkondo ayehe.
Omukuluntu gwopolisi moshitopolwa shaMusati Ismael Basson okwa ti oya manga po omulumentu gumwe sho a kwata okanona komimvo ne koonkondo.
Oshiningwanima osha holoka mokunda Omatemba koRuacana.
Natango omulumentu gwomimvo 20 anuwa okwa mangwa po sho a kwata okanona komimvo omulongo koonkondo.
Oshiningwanima anuwa osha holoka momukunda Omaambo momundhingoloko Elim Olyomakaya.
Mehuulilo shiwike omukiintu gomimvo 18 Omuangola okwali a hekwa taka pewa iilonga, sigo a ka kwatwa koonkondo shoka osha holoka mOshakati.
Natango omukiintu gumwe koWindhoek okwali a kengelelwa noka tumwalaka kopangondhi, sigo a kwatwa koonkondo.
Otaku hokololwa kutya omukiintu ngoka okwali a tuminwa okatumwalaka ta hiywa koshituthi shevalo shiifundja.
Opolisi omwendhi gwayi oya lopota omukiintu ngoka ali akwatwa koonkondo omanga eli metegelelo lyivalelwa peni.
Omakwatookonkondo oga ningi okangalo ka kehesiku, onkene opwa pumbwa oku etwa omatookolo ngoka taga vulu okushonopaleka nenge okuhilitha po iinangwanima yi li ngaaka.
Omuhingimwenyo muministeli wuundjolowele nonkalo nawa Josephine Apoopawa Kapweya okwa ti, omalongo kombinga yomakwatokoonkondo oga pumbwa okunkondopalekwa.
“Aapolisi oshowo omahangano ga yoloka oga pumbwa okumanga uukumwe kumwe okulwitha omakwato koonkondo kaaga holoke momindhingoloko ndhawo,” ta ti ngaaka.
Ta gwedhapo kutya onkalo ndyoka oya nyayikila, uuna gumwe a kwatwa koonkondo onkalo yomuntu ohayi lunduluka, ihayi kala we ya faathana.
Ta ti, oshilalo shoka uuna sha holoka momuntu ihashi polo.
Omakwato koonkondo oga pimbila noonkondo, kehe esiku oopolisi otayi lopota omakwatokoonkongo taga ningilwa aantu okuza kaanona sigo aakaluntu.