Namibia okwa indile opo ku longithwe omukalo gwopambili okukandula po omakuyunguto gopapolitika ngoka ga holoka moMozambique, konima yomahogololo ngoka ga li ko momasiku 9 Kotomba 2024. Omunambelewawiliki muuministeli womakwatathano gopaigwna Penda Naanda okwa li a pititha omushangwa mEtitano lyoshiwike sha zi ko, ngoka ga li ga holola eikwatopomutima lyaNamibia molwonkalo tayi nyenge Shipanga moMozambique.

Mozambique okwa ningi iiwike aakwashigwana taya ningi omahololomadhilaadhilo, omwa holoka wo omaipumomumwe pokati komatanga gegameno naakwashigwana, osho wo oongundu dhopapolotika itaadhi tsu dhi thithe konima sho Danie Chapo gwongundu tayi pangele yedhina Frelimo a li a sindana omahogololo gopaupresidente.

Naanda okwa ti, Namibia oku na einekelo kutya iiputudhilo yokukaleka po uundemokoli moMozambique otayi ka konga omayamukulo ngoka taga ende ontega nekotampango lyoshilongo shawo.

“Uuministeli otawu indile wo Aanamibia mboka ya iyadha monkalo ndjika nenge ya pumbwa omakwatho opo ya kwatathane nombelewa yomukalelipo gwaNamibia moPretoria shaSouth Africa, nenge kombelewa yomukalelipo gwaNamibia koZimbabwe, tayi adhika moHarare,” Naanda ta ti.
-Nampa