Auleria Wakudumo
Omupeduprima noku li minista yeemina noikwanghono Natangwe Iithete okwa holola kutya Namibia ota dulu okulonga olusheno laaveshe afe oishiindalongo ngaashi South Africa naBotswana.
Pefimbo ta popi petyapulo leedula 25 osho yo pepatululo lolusheno loketango mOshakati Etitano, Iithete okwa holola ta ti Namibia oshilongo shimwe shomwaao taku hokololwa i na eenhe detango di na eenghono odo tadi dulu okulongifwa okulonga olusheno.
Iithete okwa holola kutya Ovanamibia ova pumbwa okudiladila nokuuya po nomikalo da yooloka odo tadi wapalele nokukandula po omaupyakadi twa taalela ngaashi okuhe na olusheno koitopolwa yokoushai.
“Ngeenge South Africa naBotswana noilongo ikwao otai dulu okulonga omalusheno avo vene, oshike tashi imbi Namibia?” Iithete ta pula.
“Epangelo koshi yelelo lOmupresidente Netumbo Nandi-Ndaitwah ola holola nale kutya ole lilongekida okukwafela oshiwana nokukandula po omaupyakadi ngaashi okuhe na olusheno unene moushai. ngaashi omupresidente ha tumbula, “otuvashona unene nokukala tuvafyoona,” Iithete ta ti.
Iithete okwa holola yo kutya ehangano loPremier Energy okupitila mOshakati Premier Electric ola tula po oshimaliwa shi fike peemiliona N$100.
Minista okwa ti eshi otashi shunifa pedu okukufa olusheno kondje yoilongo, okukwashilipaleka kutya olusheno la andjakanekwa oli na ongushu nombilixa, nokuyandja oilonga unene movanyasha.
Iithete okwa holola kutya olusheno loketango otali xwepopaleke okukufa olusheno kondje yoshilongo nokukwashilipaleka kutya omwaalu wovanhu ve na olusheno owa ya pombada moshilongo.
Minista okwa indila omahangano opaumwene a kwafe epangelo nokuhanga omalalakano epangelo ngaashi okuandjakaneka olusheno kovakwashiwana.
Omukulunhuwiliki wOshakati Premier Electric Nelson Sheya okwa holola olupandu kelelo lodoolopa yaShakati molwekwatafano liwa pokati kavo.
Okwa ti elelo lodoolopa yaShakati ola kwashilipaleka kutya ola yandja onhele opo tapa tulwa olusheno eli.
“Otwa pondola okutula olusheno peenhele nhatu, twe shi ninga mekwatafano lelelo lodoolopa yaShakati,” Sheya ta ti.
Ngoloneya woshitukulwa shaShana Elia Irimali okwa holola kutya olusheno letango otali ka yandja oilonga kovanyasha, eengeshefa osho yo okuyambula po eeproyeka doinima yopaushitwe.
Oshakati Premier Electric pamwe nelelo lodoolopa yaShakati ola hangana okukwashilipaleka kutya ova adjakaneka olusheno lombilixa kovakwashiwana.
-wakudumoauleria@gmail.com