Charles Ndeumane 

ONGWEDIVA – Minista gwiilonga niiyenditho John Mutorwa okwa ti Namibia ote shi enditha nawa mokukondjitha iiponga yomoondjila.

Mutorwa ndhika okwe dhi popi pethimbo lyepatululo lyoshigongiilonga oshitimugoyi shoNational Road Safety Council shoka sha ningilwa mOngwediva moshitopolwa shaShana oshiwike sha zi ko.

Moshipopiwa she Mutorwa okwa ti shi ikolelela kehangano lyuundjolowele muuyuni lyoWorld Health Organisation iilongo yiiyemo yopevi noyopokati moka Namibia a kwatelwa mo oyo yi na oopelesenda 60 dhiihauto muuyuni, noopelesenda 93 dhomaso giiponga yomoondjila muuyuni ohadhi zi miilongo mbyoka.

“Uuyelele womakonakono giiponga yomoondjila womimvo ne dha piti otawu eta einekelo, oshoka omwaalu gomaso giiponga yomoondjila oga shuna pevi okuza koopelesenda 18 momumvo 2019 okuya poopelesenda 14 momumvo 2023. Muuyelele mbuka natango omwaalu gwaantu ya sile miiponga yomoondjila otagu ende tagu shuna pevi kehe omumvo, gwa shuna pevi koopelesenda 30 okuza pomaso ge li 609 momumvo 2019 okuya pomaso ge li 424 momumvo 2024,” Mutorwa a ti.

“Egameno lyomoopate olya pumbwa elongelokumwe lyaakuthimbinga ayehe, okuza kepangelo, iikondo yopaumwene, oshowo aalongithindjila oohandimwe. Oku adha omatsokumwe gelongelokumwe inashi gwana, iikondo ya yooloka oya pumbwa ookukutha ko iinakugwanithwa yawo neitulemo ndele e tayi longo iilonga yawo nondjungu. Etulo miilonga lyomathaneko gokomumvo ndika ta li thanekwa moshigongiilonga shika olya pumbwa eutulemo lyaakuthimbinga ayehe,” osho Mutorwa a gwedha po ngaaka.

Uuministeli wiilonga niiyenditho owa ulike iizemo iiwanawa oshoka ngashiingeyi Namibia okwa talika ko onga shimwe shomiilongo mbyoka yina oopate oopate oombwanawa muuyuni, niiponga yomoondjila otayi shuna pevi kehe omumvo.

-mrndeumaneraycharles@gmail.com