!Hūb di ǁÛs, Netumbo Nandi-Ndaitwahs ge Indiab go dī aoǁguib, soǀôan kuru!khaiba Namibiab !nâ ǂnuwis diba ra ǁkhorehare hîa ‘!Hūbaib di Soǀôaǁgâub’ ǂâiǀgaub !naka nî ǂnuwihese. !Hūb di ǁûs, Netumbo Nandi- Ndaitwahs ge nē ǂâiǀgaiba, ǂhanu ǁaeb ai hâse tsî ǀkharaǀkharas !haros ase ra mû, ǀkharisi ǂurusib ǁawoǁawos tsî sâuǁkhāsib omkhâis ǂnamipe. ǂOa ge wekheb di Wunstaxtsēs ais ge !Hūb di ǁûs, Nandi-Ndaitwahsa, Indiab ǂguro ministeri, Narendra Modib hîa ge !hūǂgaeǂguis ǀkhāba xu hâ sarisa Namibiab ǁga ūhâ ib ǀkha ūhâ i ǂnûs !nâs ge ǁîsa a mîs ge, nē aoǁguisa ǂnuwis soǀôan kuru!khaiba ǂnuwis dib ra Namibiab kai ǀaweǁguisa ǁgûbas, !hūb !nâ ǂurusib !âba ǀgaiǀgais dib ǀkha !gûǁare !khaisa. 

“Sida ge Indiab di aoǁguib Namibiab !nâ hā soǀôan kuru!khaiba ǂnuwis diba ra ǁkhoreǁhare, Nē ǂgaroba !khō!gâs ge ǁkhāti ǂhâǂhâsa soǀôana ǀkharib !nâ supuse ǀgūǀkhās ǀguisa !gâi!gâi!nâ tide, xawe sida ǁgūtsâdi,  !hū!nāsise ǂurusib !âba !gâi ǀkhāba !oa ǁāǁās tsîna nî ǂkhâ!nâ,” tis ge ge mî. !Hūb di ǁûs ge ǁkhāti ǁnāti ī ǂgom!gâba gere gowaǂui, nē !hūkha nî ǀgūǁae mâǂoa hâ ǁNâuguxoaǁguiba, ǂurusib ǂnamipe hâ sîsenǁareb !aroma xoa!gao tsî nēs ǀkha !hûǁaresa nē ǂhâǂhâsa !âb !nâ nî !noma!khō kai !khaisa. 

Hāǀaro rases ge Nandi-Ndaitwahsa, Indiab di aoǁguib, Namibiab-Indiab Aitsama ǂHarugubatsoatsoas Omkhâisens Sentersa ǂnuwis diba kai koasa ge mā, mîs rasa !oas nē sentersa ǀasa ǂâiǀgaugu, ǁkhāsiga omkhâis tîs sîsenga ǂnuwis, !gōsase ǂkham khoen tsî tarekhoedi ǁaegu nî ǀgaiǀgai amaga. 

Nē ǀgam !hūkha ǁaegu hâ ǀgaisa tsî ǀomkhâi ra !hûǁarebas gere ǀgongon!gao soab ais ge Nandi-Ndaitwahsa ǁkhawa ge !khō!gâ, Indiab a ǁnā kai ǂharugugu !hūgu Namibiab !aroma hâgu di ǀgui !khaisa. ǂGuro ministeri, Modib di saris Namibiab ǁgas ge ǀnai hâ hūǂnûǁkhaenas !gaeǁaredi nâ ǀgaisa !harosa nē ǀgam !hūkha ǁaegu go sī!nâ, ǁgūbas âs ǂurusib, ǂharugub, ǀgaib tsî ǀasa ǂâiǀgauga ǀgaiǀgais ai hâse.