Namibiab tsî Cubab hâkha ge !gam !gaeǁaresa ūhâ hîa !hūǂnûǁkhaebasa !kharuhâse īsa, tib ge Dana ǀGora!gâ-aob, Peter Shivuteba ge mî. ǁÎb ge ǂhanusi saris, Ruben Remigio Ferrob, presidenti Cubab dana ǀgapi ǁnâu!gâ!khaib dib di saris, Namibiab Dana ǀGapi ǁNâu!gâ!khaib, ǀAeǁgams !nâ mâb, tawab gere !hoa soab ai ǁnāsa ge mî. 

ǀGora!gâ-aob Shivuteb ge ge mî, nē ǀgam !hūkha di sîsenǁareb kaise !gamse ra !khoe !nomagu hîa mâǀhaos tsî !gâi tsî tsū tsēdi !nân Cubab khoena Namibiab gaxu tsî ge !gom i !norasa ôas tsēdi !nâ tani!kharu hâsa xu !goaxa. ǁNā kaise ge !gom  i tsoatsoas kurigu !nâb ge Cubaba ǁawosase Namibiab ǂgommi ai ge mâ i, huiba gere māse, mîdi !nâ ǀguis ose xawe dīb ǀkha ǁnāsa gere ǁgause, ǁnāpan ǂauna !gôab di Cubaǁî ǁkhaubasens mâisan tsî ǀnî !harodi sîsenaona Namibiab !norasasib !khamaon !nans !nâ gere am!nâxase, tib ge ge mî. 

“ǁÎn di mâxōǀkhās ge ǀunitsēs kōse sida !hūb di !nae!khaidi !nâ nî hâhâ, tsî da ge nētsēs kōse ǁnā !gom ǁaegu !nâ ge !hui ǀhōsagusib di ǀomkhâisa ra ǀgapi!gôa,” tib ge Shivuteba ge mî. 2016ǁî kurib !nâs ge nē !hūkha di ǂhanu-aisib !âb di ǁnâugu tsî !khōǁôagus ge ǂhanusise a !noma!khōsa, ǁî!nāpe hâ ǁkhāǁkhāsens tsî ǂâiǀgauga ǀgoras di ǁnâu!āgub ǀkha. 

Dana ǀgora!gâ-aob Shivuteb ge ai!â ge mî, nē ǁnâugub !nâs !hûǁaresa tanisens tsî ǁî!nāpe hâ ǁguiǂgāsens ǂhanu-aisib ǂgaoǀkhādi tsî ǂhanusi ǁgaraga hoaǁae !gôa!gâ tsî ǂoaǂamsa dīǀgaun tsî ǂande nē !hūkha di ǂhanu-aisib !âkha !nâ nî ǀgoraguse. 

“Nē sîsenǁareb tsî ǀgaiǀgai!nâgus !nâ-ūs ge sida ǂhanu-aisib !kharaga sîsenǀgaugu tsîna da ge ǀgaiǀgai tsî ǁawosase ra ai!gûsa,” tib ge noxopa ge ǀaro. Shivuteb ge ǁgui!ā tsî ge mî, ǁaupexa !nona kurigu -xa a !nāsa -ǁaeb !nâb ge Cubab ǂhanu-aisiba kai ǀkharaǀkharasensa ū tsî hoa sîsenǀgauga dī-ūnu tsî nēsi !auga!hūsi ǂgaoǀkhādi ai ra dīǀoaǀoase sîsenna ra dīsa. Ferrob di saris di ǁgūbas ge, ǂhanu-aisib !nâ kha nē ǀgam !hūkha ūhâ !gae-ǁaresa ai!âb ǁga ǀgaiǀgai tsî mâǂoahâ sîsenǀgauga ǀgoragusa. -Nampa