ǂNŪǂGOAES – ǁKharas ǀKharisi Mūǂamaos Lucia Bassons ge ra mî, în Namibiab !hūǁîna în !hao!nāsi ǁnaetiga !khōǀgara ǁnāb a hoarahus ǀgau sadu ûiǀgaugu di !gao!gaose amaga tsîs nēsa !hao!nāsi sara-anab ǀkha ǀam tamasa. ǁNāpas ge ǂNūǂgoaes ǀKharisi ǂUrusib ǁKhāǁkhākhâis Senters di !hao!nāsi naetiga tsēdīs ǁâudīb tawa ǂoago Donertaxtsēs ai dana gowaǀîsa gere mâ soab ais ge Bassonsa, ǂhâǂhâsasib sa !hao!nāsi ǁnaetiga !khōǀgara tsî ûiǂuis disa ǀgomǀgom!gao ts ge mî, ǀhûhâsigu ǀnai !hao!nāsi-i ose ûis xa ga ǀnarema hâsa, ǁnā-amaga da !hao!nāsi ǁnaetin, ū!oasa tanisenǀgaugu tsî gowab âtsa nî !ûi!gâ tsî sîsenūsa, gowab khāti a kai !â sats a taris diba amaga. ǁÎs ge ǀgaisase ǁîs di ǂâiǂhansensa gowab mâti ǂgui ǂkhamkhoen xa ra !haraxūhe tsî sîsenūhe ǂgao tama is ǂnamipe gere gowaǂuisen ǁîn !nāsase !augaba xu hâ ǁnaetina ra sao!gon tsî în !hao!nāsi ǁnaetiga ǁâudīn ǁaegu ai ǀgui ra sîsenūsa. “ǂGom!gâ ta g era sara-anab guib tit age a Nama tamas kai o a Herero ti mî tamasa, xawets satsa ama ǂnīsasib kha ǁnā !hao!nāsi sarana ǂgaeǂgā hâsa,” tis ge gere mî. ǁNāpas ge gowagu di sîsenūhes ǂnamipe ge 2010ǁî kurib !nâ dīhe hâ i !gôakhâiga gere ǀgoragu soab ais ge Bassonsa ge mî, ǁîb hoan xa !nāsase nē kharib ǁanǂgāsaben xa ra sîsenūhe gowab a Afrikaans !khaisa, gamǁîse Oshiwambo gowagu xa ra saohese tsî Khoekhoegowaba !nonaî !khais ai, ǁnāpan ge 23 persentgu ǁanǂgāsaben ǀguina ǁîn Khoekhoegowaba ǁgûsigowase ra sîsenū ti a mîse.
“Xū-i ge !khai-i ai ǂhanu tamase ra !gû Namakhoeda ǁaegu. Nē !gôagu ra gausa !oada ge ǀkharib di ǂhunuma ǁanǂgāsabeda ǂhâbasa ǂan!gâsa sada ǁgûsigowaba mā tama hâ tsî Afrikaans gowaba ra aimâi, xuige a da ǀû tsî sada ǂnīsasiba ǂoaxa-ū tsî gowab âda ǁîb !oaǂui hâ !haros ai oahā-ū,” tis ge gere ǁgâiǂuisen. ǀAms ais ge ǁnā studentna gere ǂgaoǂgao!nâ ǀgaisase ǁîn di ǁkhāǁkhāsens ai ǂâisa ǂnûi tsî ǁgûn tsî ǂhanuba !amku !nurigu ǀkha gangansa māsa.