Charles Ndeumane

OHANGWENA – Ehangano lyoNamPower olya gandja omayambidhidho getungo niitungitho yongushu yoshimaliwa shoomiliyona N$1.7 koosikola ndatu moshitopolwa shaHangwena. 

Iinima mbika ya etwa po noshimaliwa shaza moshiketha moshiketha shalyo shomayambidhindo shoNamPower Foundation oya gandjwa oshiwike shazi ko.

Oshiketha shoNamPower Foundation shoka oshali sha simaneke euvaneko lyasho lyo ku kwathela oshikondo shelongo sho sha tungile Omutaku Combined School etungo limwe li na oongulu dhi li ne oshowo ondunda yimwe yo ku pungula iikwaniipangitho yosikoia. Oshiketha shoka osha tungile wo Ewanifo Combined School nOkelemba Combined School omalugumbo goondhalate. 

Omukuluntu gwoNamPower Foundation Otilie Ngakare Mujoro okwa ti oshiketha oshi na iitayi yi li ine moka ha shi andjakaneke omakwatho ga sho, noshikondo shelongo osho ha shi pewa oshipambu oshinene shomayambidhidho goshiketha shoka. 

“Tse koNamPower oompumbwe ndhoka dhi li moshigwana otu dhi shi, unene tuu moshikondo shelongo. Oshinakugwanithwa shetu onga omahangano, aavali, oshowo aalongi oku kwashilipaleka kutya uunona mbuka wuukadhona nuumati owa pewa uunongo nena, opo wu shi pondole monkalamwenyo ongula,” Mujoro ta ti.

Mujoro okwa tsikile ta ti oshiketha shoNamPower Foundation natango inashi mana noshitopolwa shaHangwena oshoka natango otashi ka yambidhidha oosikola ndhoka dha pumbwa omatungo. “Onda nyanyukwa oku tseyitha kutya ondjila yetu noshitopolwa shaHangwena natango otayi tsikile momayalulilo gokomumvo nguka. Otwa thaneka oopoloyeka mbali dhoosikola mbali moshitopolwa shaHangwena, Oluwaya 

Combined School oshowo Titus Ndjamba Combined School,” osho Mujoro a popi ngaaka.

Ngoloneya gwoshitopolwa shaHangwena Sebastian Ndeitunga moshipopiwa she shoka sha leshwa komukaleli po gwe poshituthi shoka kansela gwoshikandjohogololo shaHangwena Johannes Hakanyome okwa pandula oNamPower Foundation molwa omayambidhidho gasho moshikondo shelongo. “Omayambidhidho ngaka ota ga ulike kutya elongo ka li shi ashike oshinakugwanithwa shepangelo alike, nomahangano ga yama kepangelo ngaashi NamPower oge na oshinakugwanithwa sha simana mo ku kwashilipaleka elongo lyokanona Okanamibia, oku pitila miitayi ya go yoku yambidhidha oshigwana. Onkene oosikola ndhoka dha pewa omambidhidho ngaka hadho adhike dha pandula, oshitopolwa ashihe shaHangwena ota shi pandula NamPower molwa uuwanawa mbuka,” Ndeitunga a ti.

mrndeumaneraycharles@gmail.com

Omukuluntusikola gwOmutaku Combined School Lucia Haulofu okwa gandja omapandulo koshiketha shoNamPower Foundation molwa omayambidhidho ngoka sha gandja kosikola ye. “Esiku ndika ota li ndhindhilike onkatu ya simana moonkalamwenyo dhaanasikola yopOmutako Combined School, Ewanifo Combined School, oshowo Okelemba Combined School oshoka nena ita tu pandula ashike NamPower ashike ota tu tyapula wo ekwatathano epe naayambidhidhi yetu,” Haulofu ta tii.

Haulofu okwa tsikile ta ti Omutaku Combined School oya huma komeho lela nkene ya tamekelwe momumvo 1979 naalongwa ye li 40 mboka ya li ha ya lomgwela kohi yomuti. Nngashingeyi oyi na aalongwa ye li 831, sho osho sha eta osikola ndjoka yi pule NamPower e yi yambidhidhe netungo limwe opo aalongwa ayehe ya mone oongulu moka ta ya longelwa.  mrndeumaneraycharles@gmail.com