Charles Ndeumane
Ehangano lyaNambia lyolusheno NamPower olya manga uukuni kumwe nehangano lyaChina opo ya nduluke po opoloyeka yolusheno lwetango lwoonkondo dhi thike poomegawatts (MW) 100 moRosh Pinah. Opoloyeka ndjoka onene yi vule oopoloyeka dha NamPower adhihe dholusheno lwetango noyi inekelwa tayi hwepopeke eyandjakaneko lyolusheno moshilongo.
NamPower okwa ningi euvathanotsokumwe nehangano lyoChina Jiangix International Economic and Technical Cooperation oshowo China New Energy Development moka taya ka tota po opoloyeka onene yolusheno lwetango moRosh Pinah.
Shi ikolelela kuuyelele wa pitithwa kuNamPower, opoloyeka ndjoka otayi ka tulwa popepi nondoolopa yaRosh Pinah oshoka oko ku na onkalo yombepo tayi opalele olusheno lwetango.
Sha landula sho NamPower a pewa oshimaliwa shoobiliyona N$1.3 kehangano lyaGermany lyoGerman Development Cooperation okupitila mombaanga yaGerman yehumokomeho yo-KfW, omunambelewa omukuluntuwiliki gwaNamPower Kahenge Haulofu euvathanotsokumwe ndyoka ya tula miilonga kalyi li ashike kombinga yoshimaliwa.
“Ndika elongelokumwe lyehumokomeho oshowo oshinakugwanithwa shokugamena omudhingoloko. Mpaka ota tu ti ekoko lyopamahupilo noshinakugwanithwa shokugamena omudhingoloko ohayi endele pamwe. Nampower oku uvite etumba okuya meuvathanotsumwe lyekwatho lyopashimaliwa no-KfW,” Haulofu ta ti.