Auleria Wakudumo
Ehangano lokuandjaneka omeva moshilongo, NamWater ola yandja omambo ongushu yoN$240 702, keefikola di li 12 moshitukulwa shaHangwena. Eshi osha ningilwa koKaupumhote Nghituwamhata Combined School, moshikandjo shaEenhana, mEtitatux.
Omukulunhuwiliki waNamWater Abraham Nehemia okwa holola kutya NamWater ota twikile okuyandja omakwafo koshiwana okupitila moipambele yehongo.
“Ohatu twikile nokuwanifa po omaudaneko moshiwana, a pamba omhangela yetu nomangela yexumokomesho loshilongo koshi yoNDP-5 osho yo Harambee Prosperity Plan II,” Nehemia ta ti.
Nehemia okwa ti NamWater ota lalakanene exumokomesho lounona nokuyambula po oshiwana.
Omambo otaa ka kwafela eefikola da yooloka moikandjo ya yooloka moshitukulwa shaHangwena. Nehemia okwa weda po ta ti omambo otaa ka kwafela yoo okuxwepopaleka omhumbwe yomambo meefikola dokoushai.
“Ekwafo eli otali kwafele okuhanga elalakano laNamWater “omuhongwa umwe, nembo limwe,” elalakano olo tali kwashilipaleke kutya keshe okaana otaka mono ehongo lopombada opo ka kale ke na onakudiwa i li nawa,” Nehemia ta ti.
Eefikola da mona omambo ongaashi Oshamono Combined School, Onanona Combined School, Ndjabeka Primary School, Elakalapwa Combined School, Onamunhama Combined School, Kaupumhote Nghituwamhata Combined School, Lazarus Haufiku Combined School, Oshawapala Combined School, Okahenge Combined School, Ounyenye Combined School, Haihambo Primary School osho yo Amwiimbi Combined School.
Ta tambula ko ekwafo la yandjwa, ngoloneya woshitukulwa shaHangwena Sebastian Ndeitunga okwa holola kutya ekwafo la yandjwa kalifi ashike lomambo ndele ota tungu eendjodi nonakuiwa yovahongwa.
“Mokuwanifa po oipumbiwa yehongo lovahongwa vetu, itatu lundulula ashike oidjemo yavo ndele ohatu tungu onakuiwa yovaleli ovo tava ka lela oshilongo shetu nokushixumifa komesho,” Ndeitunga ta ti.
Omhangela yaNamWater vati itai xulile ashike mokuyandja omambo, otava twikile okuyambulapo elongo lokomikunda mokupitila meandjo loikwafifohongo ya wedwa po, omatungo nexumokomesho loungoba meefikola, omakwafo exungomwenyo meefikola nosho yo okuyandja odalaxa kovahongwa.
Ndeitunga okwa kumaida ovahongwa opo va longife omambo oo va pewa okulundulula eenghalamwenyo davo.