OLUSHANDJA – Omukuluntu mehangano lyoku andjakaneka omeya NamWater Abraham Nehemia okwa ti ehangano otali pumbwa oobilliona N$2 okukolonga okanala opo omeya ga tondoke ga manguluka.
Nehemia okwa po pi ngaaka Etiyali pethimbo NamWater a tameke okupomba omeya okuza kondama kOlushandja, ngoka taga matuka ngaashingeyi nokanala taka ithanwa Etaka-Uuvudhiya.
Omeya ngoka ogo eyamukulo kenota lyaantu niinamwenyo noshowo kuunafaalama wiikwamboga miitopolwa Omusati nOshana.
NamWater okwa longitha oshimaliwa shi thike poomilliona N$3.9 okulonga okanala hoka kuuka kUuvudhiya.
“Uupyakandhi womeya ohau holoka uuna omuloka inaagu loka nawa, noku wu kandula po ohashi pula oshimaliwa oshindji okuza moshiketha shepangelo,” ta ti ngaaka.
Nehemia okwa ti momasiku omashona geli komeho otayaka patulula oopomba dhomeya koCalueque opo ondama yOlushandja ndyoka hayi gandja omeya kEteka dhi kale nomeya ethimbo alihe, itaali pwine we.
Ta fatulula kutya omeya ngoka ga tameke okupombelwa mokanala Etaka-Uuvudhiya nelalakano lyokuyambidhidha aanafaalama yiimuna nomeya, oga tegelelwa ga thike kUuvudhiya muOktomba nuumvo.
Aanafaalama yiimuna oyendji monooli oya tembukile moshitopolwa shaShana, taya kongo uulithilo wiimuna yawo, omolwondjala oshowo enota lya etwa komvula inayi loka omumvo gwa yi.
Aanafalama ya za kiitopolwa Omusati oshowo Ohangwena oya dhiki ootenda dhawo oshowo iigunda moshikandjohogololo shUuvidhiya, ya kalela iimuna yawo.
Kansela gUuvudhiya Timoteus Shivute okwa po pi ta ti, aanafaalama oyendji oya taalela uupyakadhi womeya, shoka sha li she ya thiminike okukonga ekwatho lyokupombelwa omeya okuza kOlushandja.
Shivute ta ti, iimuna oya kala ya taalela enota nonando omwiidhi nago otagu nyangwaanyangwa.
“Omvula ndjoka inaayi loka nawa omimvo dha piti oya etitha omangungo gaanafaalama yiimuna okuza kiitopolwa yawo okuhupitha iimuna yawo,” ta popi ngaaka.
Shivute okwa ti aanafaalama taya kongo uulithilo wiimuna yawo oya ponekele moshikandjohogololo shawo, hoka kwa talika oko ku na ehala ewanawa nuulithilo.
“Uupyakadhi unene
omeya, omwiidhi ogu shi ngaa okwiindhindhimikilwa sigo omoomwendhi dha landula, Sigo onena inatu lopotelwa oshimuna sha si kondjala, niimuna oyi shi natango okutalika komalutu,” ta popi ngaaka. Omunafaalama Sam Shekunangela ngoka a tembukile kUuvudhiya a zi koshitopolwa shaMusati komukunda Ongali okwa ti, onkalo oya nayipala, nongele otayi tsikile yi li ngaaka, otashi ka hulila muuwinayi.
“Otwiinekela omeya otagaka thika pethimbo omanga iimuna yetu yina natango oonkondo,” ta po pi ngaaka.
Ta gwedha po ta ti omeya ngoka ga pombwa otage ya pe omukumo lela.
Sophia Pinihas omunafalama gwiikwamboga kOlushandja okwa ti omeya ngoka ga pombwa oga eta enyanyu oshoka oshikunino she ka shili kokule nokanala komeya ngoka guuka kUuvudhiya.
“Otashi tu pe omukumo okutala omeya taga tondoka, tuka longe nuudhiginini okuindjipaleka iikulya moshilongo,” ta pandula ngaaka.
Omukalelipo gwelelo lyopamuthigululwakalo Malakia Shoombe esiku ndyoka okwa ti elelo olya pula uuministeli wuunamapya omeya, omavi nomatulululo opo omeya kaaga pwine mo we mEtaka. “Omeya ngoka oga pumbiwa noonkondo kaanafalama moshitopolwa shetu, unene aanyasha mboka haya nyangadhala opo yiihupithe,” ta ti ngaaka.