Oshikunino shiikwamboga shedhina Harambe-Oyetu shoka sha tamekwa momumvo 2019 osho sha patululwa pambelewa komupeha Presidente Netumbo Nandi-Ndaitwah.
Oshikunino shoohekta 20 shoka ohashi kala tashi landitha iikwamboga yayooloka, opo sha tameke okushingitha nuumvo lwotango. Oshikunino shoka osha totwa nelalakano lyokuhupitha aakalimo yomoshitopolwa shaKunene no sha thikamekwa po koshimaliwa shoomilliona ntano okuya po.
Nandi-Ndaitwah okwa kwashilipaleke kutya epangelo otali kala tali yambindhindha poompito adhihe o po oshikunino shoka sha nuninwa okupalutha oshigwana shi hume komeho.
“Epangelo lyetu otali kala noku yambindhindha ooproyeka ngaashi ndjika yoHarambe-Oyetu, omolwa onkandangala onene tadhi dhana okukandula po ondjala oshowo oku e ta po oompito dhiilonga moshigwana,’’ ta po pi ngaaka.
Ta ti, nonanndo oproyeka ndjika ngaashingeyi oyili momake goNational Youth Council otayi pumbwa omayambindhindho okuza kuuminiteli wuunamapya, opo oshikunino shi vule okuhuma komeho.
Nandi-Ndaitwah okwa kumagidha oshigwana shi kale tashi yambindhinda iikunino yiikwamboga opo yi vule okutsikila okulonga yo yaaha se po.
Ngoloneya gwoshitopolwa shaKunene Marius Sheya okwa ti ooproyeka ngaashi ndjoka otadhi totwa miikandjohogololo ayihe moshitopolwa shawo.
“Otuna etengenekothaneko oshikunini shoHarembe-Oyetu shiye po nuunafalama woondjuhwa oshowo woohi,” ta ti ngaaka.
Ta ti, sho kwali a talelepo oshikunino shoRoots Project koStampriet okwa fuulwa nokwa zi ko niiholelwa opo a tameke iikunino oshowo uunafalama ngaashi waahoka.
Omukalelipo gwaChina moNamibia Zhao Weiping okwa ti oya yambindhindha oproyeka ndyika omolwa elongelokumwe pokati kaChina naNamibia muunamapya.
“Ondi shi shi nawa kutya Namibia ota longo nuudhiginini okukwashilipaleka kutya oonkalamwenyo dhAanamibia odha lunduluka okupitila muunamapya,” ta ti ngaaka.
Ta ti, epangelo lyaChina otali tsikile okuyambindhindha Namibia netompelo lyokulongela oshigwana shaNamibia uuwanawa oshowo okuhumitha komeho oshilongo.