OGONGO – Omupresidente Netumbo Nandi – Ndaitwah okwa pandula oshiputudhilo shopombanda shOgongo omolweyitulemo lyokunduluka iikulya osho wo okuninga omapekapeko opo ku indjipalekwe eetepo lyiikulya. 

Omutse gwoshilongo okwa popi ngaaka Omaandaaha sho a talele po oshiputudhilo shOgongo, omanga inaa tsikila kEtunda hoka natango a li a talele po nokutala nkene onkalo yokunduluka iikulya yi li. 

Omanga inaa ya konooli Nandi-Ndaitwah okwa z i kiitopolwa koKavango yokuuzilo nokuuninginino nokwa li a hulile koZambezi hoka natango a li a talele po ooproyeka hadhi nduluke iikulya. 

“Uunamapya owo ehukamugongo lyoshilongo, mboka tau vulu okutaandaleka eliko lyoshimaliwa moshilongo nokukandula po ondjala noluhepo. 

Onda mono aanyasha oyendji taya kutha ombinga moshimpungu shuunamapya shoka tashi hokitha notashi ulike euveko lyaanyasha mpoka lyi thike nena. 

“Ohandi kala ndi uvite ohokwe sho aanyasha taya kutha ombinga miimpungu yuunamapya oshoka nale oshimpungu shuunamapya osha li sha talika ko shaantu mboka yaa uvite ko,” ta ti tanga ngaaka. 

Nandi-Ndaitwah ta ti, oshimpungu shoka okwa li sha talika ko shoongaga, ihe osho shi na oshilonga sh ivulithe iimpungulonga oyindji. 

Tagwedhapotati, ngeleoshilongo tashi longo neyitulemo osho wo nuudhiginini, monakuyiwa otashi ka landitha wo iikulya kiilongo yokondje, nopamukalo ngoka eliko moshilongo otali indjipala 

“Otu na omahala ogendji nagamwe opo taga tungwa, taga monika nawa pakutala ihe itaga landitha iikulya tayi ndulukwa moshilongo, shoka hasho ehumokomeho,’’ ta nyenyeta ngaaka. 

Ta gwedha po ta ti, ehumokomeho ongele iikulya tayi longwa moshilongo. 

Nandi-Ndaitwah okwa popi ta ti, oshilongo shoka itaashi vulu okwiipalutha sho shene, nena itashi vulu okwiithikamena po kusho shene. 

“Onkene oshilongo oshi na okulonga nuudhiginini, opo kaashi ka indile puushiinda. Otandi kumagidha aanafaalama ya longe nuudhiginini okuyambula po eliko lyoshilongo osho wo okukandula po ondjala moshilongo, 

“Itatu vulu okupopya ekandulepo lyondjala, inaatu tumbula nkene tu na okulonga opo ku kandulwe po uupyakadhi mboka hau eta ondjala, oshoka ohau kandulwa po uuna wa tulwa miilonga,” ta kumagidha ngaaka. 

Omupresidente ta kumagidha kutya aanyasha itaya vulu okukala yaa na iilonga, omanga ye na ompito yokwiilongela yo yene. 

Nandi-Ndaitwah okwa popi kutya ngele aanyasha oya kutha ko oongaku e taya itula mo muunamapya, oyendji otaya ka hulitha po enyenyeto lyokwaa na iilonga,” ta popi ngaaka. 

“Otwa pumbwa okukala tatu dhiladhila tatu endelele okuya po noompito osho wo oondunge ndhoka tadhi tu tungu okuhuma komeho, osho wo opo tu vule okukandula po ondjala moshilongo,’’ ta ti ngaaka. 

Ta gwedha po kutya uunamapya ohau pula oondunge, omadhiladhilo, oonkondo osho wo eyitulemo,’’ ta popi ngaaka. 

Omukuluntuwiliki gwoshiputudhilo shOgongo Christopher Mberema esiku ndyoka okwa popi kutya nonando iimpungu yiikulya taya longo oya nuninwa unene aalongwa opo ya ninge omapekaapeko gawo, natango ohayi palutha wo oshigwana. 

“Otwe ya po natango nopologalama ndjoka hayi longo aanafalama nkene ye na okukokeka uunafalama wawo. Shika osha yambidhidha oyendji okunkondopaleka uunafalama momundhingoloko nguka gOgongo,” ta fatulula ngaaka. 

Omunafaalama gwiikwamboga Soini Ndikwetepo ngoka a li a mono ontseyo okupitila mopogalama osnhona okupitila moshipundhilo shOgongo okwa ti, ongeshefa ye otayi ende nawa. 

“Omolwontseyo ndi na paife ondi shi shi okukondolola iikwamboga yandje. Ookasitoma otadhi tondoka, ngashiingeyi ondi na oositola dhi li ndatu oonene kOngwediva nOshakati hoka handi fala iikwamboga yandje,” ta ti ngaaka. 

Ta ti, ihoo pandula noyaka. Ndikwetepo okwa ti oha mono oshimaliwa sha gwedhwa po okuza miikwambogwa ye. 

Oshikunino she ohashi nduluke oomboga, omatama, oonyanga, uunawamundesha, iikapa, iihakautu, niikwayo yilwe. 

-vkaapanda@nepc.com.na