Omupevipresidente gwongundu yoSwapo Netumbo Nnadi-Ndaitwah okwa li a pandula keholokopo lyaanyasha esiku lyoshigongi shaagundjuka shoka sha li ko oshiwike sha zi ko mOngwediva.
“Omwaalu nguka otagu ulike iizemo iiwanawa, go otagu ulike nkene aanyasha ya hala okuhumitha oshilongo komeho,’’ ta pandula ngaaka.
Nandi-Ndaitwah esiku ndyoka okwa kumagidha aanyasha ya thike mehwata momasiku 27 gaNovomba opo ye ke mu hogolole. Ta ti, ngele okwa hogolola ota ka eta omalunduluko moshigwana nuunene maanyasha. “Otandi ka thinda omuthindo unene pekandulepo lyuupyakadhi wiilonga maanyasha, osho wo melongo,” ta popi ngaaka. Ta gwedha po kutya ota kwashilipaleke kutya kohi yelelo lye, iilonga itayi ka kala uupyakadhi moshilongo.
Nandi-Ndaitwah okwa ti, otapu totwa omilandu, dhokwaapula aalongwa ya mana eyilongo lyawo kiiputundhilo yopombanda ontseyo dhoomwendhi oondatu nenge hamano.
Ta ti, iilonga yaaluhe otayi ka gandjwa pwaa na omapulo goontseyo.
Amushangandjayi gwewawa lyaanyasha moSwapo Efraim Nekongo esiku ndyoka okwa indile omupevipresidente Nandi-Ndaitwah kutya sho ta sindana, na kandule po uupyakadhi wa taalela oshigwana, unene aanyasha.
“Otwa hala wu kandule po uupyakadhi wiilonga, ondjala nuunene otwa hala wu thinde omuthindo ponkalo yelongo, nayi lunduluke,” ta indile ngaaka.
Nekongo sho ta indile ngaaka natango okwa indile aanyasha ya ka hogolole ya tala nawa opo ya mone omayakulo ngoka ya hala. Saima Simeon omunyasha gumwe a li poshigongi mpoka okwa ti, nuumvo oku na omukumo kutya ongundu yoSwapo otayi ke shi enditha nawa nomwaalu gwa pitilila . “Aanyasha oyendji oya dhimbulula noya galukila kongundu yoSwapo,” ta ti ngaaka.