Auleria Wakudumo
Ehangano lovahongi Ovanamibia (Nantu) ola pata ofikola imwe moRundu, omanga ikwao nayo i li metifa lokupata shaashi dihe li monghalo i na oukoshoki.
Epato leefikola ole ya konima eshi eefikola da lopota koikundaneki kutya ounona ova ninga oule woivike itatu tave likwafelele ashike moluumbo lofikola shaashi oundjuo itava longo.
Hamushangandjai woNantu Loide Shaanika nosheendo shaye osho yo osheendo sha dja kouministeli wouhaku ova talela po ofikola opo va tale onghalo oyo ovanafikola novahongi ve li muyo. Ova talela po Ndama Junior Primary School, Ndama Combined School, Kaisosi Primary School noSarusungu Combined School. Omunashipundi woNantu moKavango East, Petrus Kashumali okwa ti ehangano ola pata nale ofikola imwe, Ndama Junior Primary School mEtivali po11h00.
“Ndama Junior Primary shaashi oyo i li monghalo ihe shi kutalwa oya pata fiyo omEtitano, ashike ngeenge inapa kandulwa oudjuu oo nomOmaandaxa itave ya ko kofikola,” Kashumali ta ti.
Sarusungu Combined natango vati nayo oi li monghalo ya faafana noNdama Junior Primary omanga Kaisosi i li xwepo ashike oudjuo wovahongi itava longo.
“Ovahongi pofikola novalongwa itava dulu okukala pofikola puhe na omeva. Kakele kofikola ihe na omeva oule woivike itatu, oundjuo vati navo itava longo shaashi omalambo onyata okwa yada, Kashumali ta ti.
Kashumali okwa ti ovahongwa novahongi otava dulu okukwata komikifi.
“Sho osho sha eta tu mone epitikilo tu di pate. Kape na omuhongi ile omulongwa te ya kofikola manga oupyakadi inau mona ekandulepo,” Kashumali ta ti. Ovahongi pofikola Ndama Junior Primary ova ti navo paife ova tila okukwata omambo ovahongwa shaashi ounona otava dulu okukwata onyata yavo ndele tave ya vali okushanga mongulu unene tuu shaashi ofikola oi na ashike ounona vashona okudja pondodo 0-7.
“Vamwe ohava lyata onyata, eshi tave uya mongulu omwa nyika ashike,” umwe womovahongi ta ti.
Ovahongi ova holola kutya kape na vali oundjolowele pofikola shaashi kape na nande omeva okulikosha keenyala.