Moomu yina kara asi nosure domoNamibia tadikapaturuka vakaronge vanona kulironga kontambo ndunge 11 ntani 12, mbunga zovamitili zadivikwa asi NANTU, kavatente asi nosure nadinye dahepa kugwana yiruganeso youhaku komeho zikapaturuke sure mwa Pembagona 1. Ano nsene epangero kapi naliyisikisamo oyo, awo kuna parapo asi hawe nosure kapi nadikapaturuka.
Twahepa kuyidiva asi ose kapi tuna kara noudigu wokukapaturuka nosure, nye eyi tuna hara asi ukanguki wovantu hameni vetu wahepa kuzera asi ngapi vana kukakara ponosure ntani mukaro nye gwawo goyirugana twahagutara namo peke.
Ano awo simpe kuna sikama potambo zawo ezi vageve koministeli zerongo sivike sina pu, omu vatulire asi kwato sure nazipaturuka nsene asi oyo vana kupura kapi yina siki mouta wakora.
Yimo ana kutanta Loide Shaanika, hamutjanga ntoni gombunga zovamitili omu epangero lina gava mbudi asi nosure tadi kapaturuka, monontambo ne, kutameka nontambo ndunge 11 no12, pokuhova mwaPembagona ava vana kara asi kuna kuvandindira vakahingire mokutjanga makonakono kehagero lyomvhura. Shaanika katente asi mbunga zendi kwahingira novagendesi nosure wontambondunge 11 no 12 monomukunda horowero nadinye 14, mokuvahuyungisa nokuvahuyungisa vatere asi ngapi omu vana liwapayikire vakatameke mo3 Pembagona, nokuronga vanona mononkondwarongero.
Shaanika kayizeresere nawa nawa asi nosure kapi simpe dinawapa vakapaturukise morwa kapi vana weke Yuma yongandi yokuruganesa paukanguki ntani kuna kara nye noudigu woyimaliva asi vagusepo udigu ou. Morwa yoyo nye, mbunga zendi kuna kuhundira ministeli zerongo asi vatulisepo yihepwa eyi komeho zomazuva 3 Pembagona.
Oyo vana hara kuna kara mavango vapira kukutira vamitili vagakutire ntani vakare nelikwamo lyokutjingisa pausimbu mavango ogo, ano nonkondwa dakere asi hambara vadidike komeho vatundepo vahepa kudidika yipo veta zokutanta asi kwato kulikundama namukweni zirugane.
Ntani nonkondwa rongero dahepa kukara asi dina gwanene yipo vanona valigaunuke, moomu yina kuwapera. Nantu simpe kuna hara asi varongi vavahedere mokuvakunakona ava vanahara ekonakono. Ntani simpe awo kuna hara asi posure pakare mema ntani yikasayise.
Ntani vanasure navenye vavape yokudwara kosipara nayikara asi veta ezi navavhura kusikisamo ndi asi vana kusikisamo navenye vana kuza pevango vana kara vantu wovanzi.
“ Nosure nomararo nagenye vahepa kugazeresa ntani ukanguki wana venye wahepa kuhoroka ntani. Ntani pakare nye nombatero kovarongwa nokovarongi’’ yimo ana kutanta nokuhulisa ngoso Shaanika. – anakale@nepc.com.na