Minista wouhaku nonghalonawa Dr Kalumbi Shangula okwa kunghilila oshiwana opo shi kale tashi longele kumwe novanailonga voundjolowele mokukondjifa omukifi wo-TB.
Okwa ti o-TB oyo omukifi umwe wa nyika oshiponga mounyuni eshi hau dulu okukwata ovanhu 30 000 mefiku limwe omanga ovanhu 4 000 ohava lopotwa va fya mefiku limwe mounyuni aushe.
Edi Shangula okwe di popya Etitano pefimbo eshi kwa li tava dimbuluka efiku lo-TB mounyuni kosekundofikola Nehale momukunda Onayena, moshitukulwa shaShikoto.
Shangula okwa ti osha fimana ngeenge oumimisteli wouhaku tau kala u na oikwafifo ya wana shaashi eshi osho omukalo muwa tau dulu okukondjifa ombuto yo-BT moshilongo.
Okwa ti omudo wa dja ko Namibia okwe shi pondola okukala a panga ovanhu ve na o-TB neepelesenda 88 eshi kwa li ashike a kambifila ko ee2% dokukala a hanga ee90% edi ta tulwa po kehangano loundjowelele mounyuni lo-WHO.
Onghee minista okwa ti eshi otashi ulike efano liwa kutya Namibia ota longo noudiinini okukondjifa ombuto yo-TB opo a kwashipaleke kutya ovaudu ve na o-TB ova veluka.
“Ouministeli wetu otau kwashipaleke kutya ovanhu aveshe ve na omadidiliko ombuto yo-TB ova konakonwa opo va dule okukala va mona epango diva,” Shangula ta ti.
Minista okwa ti oministeli youhaku otai lalakanene okukala ya yandja omadeulo kovanailonga woundjowelele kombinga nghee ve na okukala va yandja omayakulo mawa kovanaudu ve li kepango lo-TB nokukala yoo vali va kale ve na ounongo uhapu wokupanga o-TB.
“Ovakulunhuwiliki wouhaku moitukulwa nava kale tava xwaxwameke ovanailonga vouhaku opo va longe nondjungu yokukala tava yandje ninga oikonga yokuyandja ouyelele moshiwana kombinga yombuto yoTB,” Shangula ta ti.