ONDANGWA – Omukwaniilwa woshitunda shaNdonga Shuumbwa Nangolo okwa ti elelo lavo ita li popile oshiningwanima shomulumenhu weedula 25 ou vati a dipaa omulumenhu weedula 41 ndele te mu tete oilyo youlumenhu waye.

Omukwaniilwa okwa kumaida ovadali opo va xungile nounona vavo opo ku kelwe vaha longe oimbuluma vali.

Okwa weda po ta ti osha fimana ngeenge ounona tava pewa ehongo kombinga yomifyuululwakalo shaashi otashi kwafele vaha longe oimbuluma.

“Ngeenge omudali ita longo okaana kaye oku ka lombwela kutya shonhumba osha puka nena omudali okwa teelela okaana kaye ka longe oimbuluma,” ta ti.

Okwa ti osha fimana opo omudali keshe a kwashilipaleke kutya ota popi nounona vavo momaumbo kombinga yonghalamwenyo opo ve he ke li hange ve li meedolongo.

“Kape na omudali ha kala e udite ombili ngeenge okaana kaye ke li modolongo. 

Ounona otava londeke eehonde dovadali vavo ngeenge tava longo oimbuluma i nyanyalifa,” ta ti.

Oshivike sha dja ko opolifi oya lopota kombinga yomulumenhu Salom Nicanor e lituwa momeva onyata a xulifa a tetwa oilyoayaye youlumenhu.

Omutamanekwa Andreas Kanyanga ta longele kwa li metanga leameno okwa anyenwa omhito tokulifutila modolongo pefimbo a holoka momhangu yaNdangwa.

Omukwaniilwa okwa ti oiningwanima sholudi eli otai nyemateke unene moshiwana shaashi oikumwifa.

Okwa popya ta ti ovanhu tava longele vakwao omunyonena shaashi va hala okulya oupule lomalalakano onhumba.

“Ovanhu vamwe ohava kala va tumwa vaka longele vakwao omunyonena osho shi li sha nyika oshiponga. Oinima aishe ei otai ningwa shaashi ovanhu inava hala okuwanenwa kwaashi ve na,” ta ti.

-fhamalwa@nepc.com.na