WINDHOEK Ooyene yOotiivii mboka taya futu oolisinisa dhawo koNBC, oshimaliwa shoka ye na ko nenge oongunga dhawo adhihe otadhi ka dhimwa po. Ndjika ompito yesilohenda ndjoka ya pewa ooyene yootiivi ayehe mboka ye na oondjo. Onkundana ombwanawa oyo ndjika kutya NBC okwa gandja esilohenda ndika nuumvo. Naashika otashi ti aantu ayehe mboka ye na okuningulula oolisinisa nokufuta oolisinisa dhawo noye na oongunga okutameka 1 Kotoba sigo 30 Novomba 2006, oongunga adhihe dhoka ye na otadhi ka dhimwa po ngele oya ningululitha nokufuta oolisinisa dhawo. Otiivi yimwe ohayi futilwa N$204.00 komvula momuntu, omanga iifuta yomahangano noongeshefa omuyalu gwiifuta yawo ogwi ikwatelela kOkakalata kIifuta koNBC. Ooyene yoolisinisa dhootiivi mboka ya futa nale muule wethimbo lya zi ko otaya tegelelwa ashike okufuta oolisinisa dhawo dhomumvo 2007 – ano mboka kaye na oondjo nenge iifuta yi li konima. Oshimaliwa shika osha kwatela mo uule wethimbo okuza esiku 1 Kotoba sigo 30 Septemba omvula tayi landula, ano 2007. Oshi li ngeyi kutya mboka taya ka ndopa okukala ya futa oolisinisa dhawo otaya ka mona egeelo okufutithwa iimaliwa ayihe yomimvo dha pita nenge oondjo adhihe dhoka ye na koNBC. Momukanda kiikundaneki, Omukuluntuwiliki goNBC, Vezera Bob Kandetu, ota ti oNBC ngashingeyi oya kutha ko pambelewa oshinakugwanithwa shokufutitha nokugongela iifuta yoolisinisa. Oshimpwiyu shika osha li sha gandjwa miikaha yehangano lyedhina Penduka Africa (Pty) Ltd. NBC noPenduka Africa oya adha etsokumwe opo NBC a kuthe ko oshinakugwanithwa shika shefutitho lyoolisinisa okuza miikaha yoPenduka Africa okutameka esiku 1 Septemba 2006, Kandetu ta yelitha. Oshinakugwanithwa shokugongela nokufutitha iimaliwa yoolisinisa okwa li sha gandjwa koPenduka Africa muApilili 2004. Shika otashi ti NBC oye ngashingeyi e na oshinakugwanithwa she okugandja nokufutitha iimaliwa ayihe yoolisinisa dhootiivii okuza kooyene ayehe yootiivii moshilongo. Oveta onti-9 yi nasha nIikwatiivii moNamibia, NBC okwa pewa oonkondo paveta okugongela nokufutitha iimaliwa yoolisinisa okuza kooyene yootiivi oshowo mboka haya landitha iikwatiivii. “Onkee, Aanamibia ye na ootiivii oshowo aalandithi yootiivii otaya tegelelwa ya ningulule nenge ya fute oolisinisa dhawo dhomimvo dhika 2006/2007 koNBC ihe kashishi we koPenduka, oshoka oshinakugwanithwa shika ngashingeyi osha shunithwa ishewe miikaha yoNBC,” Kandetu ta ti. Edhiminopo lyoongunga dhiifuta yootiivi kooyene yootiivii oli li ekumiko koshigwana shi ninge hashi futu oolisinisa dhasho neitulomo. Kandetu oti indile aakwashigwana ya longithe ompito ndjika nawa okuya ya fute oolisinisa dhawo okuza esiku lyotango lyomwedhi Kotoba, opo ya yande okufutithwa omikuli niihohela koongunga dhoka ye na ngele inayi iyutha kesilohenda ndika lya tulwa po. Iimaliwa yokufuta oolisinisa ngashingeyi otayi vulu okufutwa moombaanga adhihe moshilongo, iitayi yoNampost oshowo ohala agehe goNBC miitopolwa ayihe. Onomola yoakaunta yombaanga oyo: 62061199602, First National Bank. Dhimbulukwa okukoneka onomola (reference number) yoye oshikando kehe to futu olisinisa yoye. Omuntu kehe ta landa oTV oku na okukala andola a pewa onomola ndjika.