Mo Venduka
Varondi wono besa nono Taxi gona ngesi vahepa hena kutara momalimba, eyi kuna wizirepo morwa ndando zomaholi ezi zina kanduka, nawo yiyo vana kukandwisa no 10% mfuto zawo. Vagendesi va NABTA, nare vana gusa kutara nokufira sinka varondi vawo nye ngesi hawe nawo kapi vana kuvhura hena, yimo ana kutanta Presidente gwazo Magnus Nangombe.
Moutano una pu, ministeli zonomina nomarutjeno kavageve ntumwaraka asi maholi taga kanduka hena rwauntazimwe, momvhura ezi. Ezeruko eli nare kali horokere mouvali una puko. Ano kwa NABTA ngesi rwauvali vana kuzerura mo mvhura. Sivike esi kasipwire ndango zositata nazo kazigeve ezwi asi tazi zerura mfuto zazo nodollar zimwe. Maholi kuna zeruka no 75c go leaded ntani gounleaded. Ano disera 66c. Ano no Tax tadi zeruka no 50c eyi ntaantani tupu ayigave NABTA asi ezuvake nayitameka. Ezeruro eli pomuntu mundinda gwendi ano ava wokuza ure varondeki navapura varondi vafutire nondjato dawo dononene. Musingi gumwe go Tax katente asi ezeruro eli lina gumu ngesefa zendi eturoko yisilinga yitano oyo nayimwesi. Oyo nayimwesi nampili tupure N$7.50 yimo ana kutanta Ndemufaya Amagongo.
Age simpe katente asi kapisi navenye vasingi wono Tax asi kugwana nzambi zongwa. Vadiva yoekonomi vana gava marondoro asi vahepwe tayi vagumu unene eyi yondondo zomaholi, unene mo Namibia.
Nondja, mema rutjeno nayinye yina kanduka kuna kugwedako koudigu.
Amagongo katente asi apa zakere mfuto ko tax N$6.00 hawe ose ngatu gwana varondi. Ano ngesi vantu kapi tatu vagwana. Ngesi tatu hepa. Morwa nobaki nado kwakurondeka vantu. Apa yakere mo kwedi kuvhura ogwane N$6000 ano ngesi hawe. Sihonena ehauto lyo 1.3 kuvhura kuruganesa N$350 mezuva.
Nangombe katente asi vasingi no Tax vahepa kuyizuvha asi kapisi vavake vantu ndi asi ose kuna kuzerura tupu, nye vahepa kutara asi maruha nagenye gahepa kugwanenamo uwa. Vahepa kudiva asi mahauto gawape ndi vasingi vavafute, nye maholi kuna kureta katukutjima. Twahepa kutura mahauto getu momu wa. Nsene kapi tuna kuyirugana oyo hawe ose kuna kureta udigu yimo ana kuhulisa Nangombe.