Auleria Wakudumo 

Omundokotola Fillemon Nakanduungile oo ta tamanekwa eponokelo linyanyalifa lomweeti woihokolola womomhangu yamengestalata waNdangwa, Justine Shiweda okwa holola kutya ke na ondjo moibofa aishe oyo ta tamanekelwa. 

Eshi a holoka komesho yaMagestrata Lutaka Mutwa ,Omaandaxa mOndangwa okupwilikina eindilo laye lelifutilemo olo a tula mo, Nakanduungile okwa holola kutya kena ondjo moibofa ivali, mekendabalo lokudipaa osho yo okulongela kumwe meemangela dokudipaa omweeti woihokolola. Nakanduungile okwa ti ke na ondjo shaashi molwaashi vahapu ovo veli moshibofa shavo kevashi nokena ekwatafano navo. Omundokotola okwa twikila ta ti okushi ashike Abner Mateus oo ta ti okumushi ashike onga omapangwa waye, nomuye okwa shiiva omupolifi nale oo naye eli moipandeko Shipanga Mateus. 

“Ngaashi umwe womovafeekelwa onde mu mona ashike lwotete modolongo,” Nakanduungile ta lombwele omhangu ngaho. 

Omundokotola okwa dimina kutya okwa kwatafana nomufekelwa umwe mefiku loshiningwanima. Okwa ti omupolifi nale Mateus okwe ya keumbo laye oko eya okumupitula opo vaka nwe okaofiwa, ashike ina ya shaashi okwa li nomukainhu nova hangwa va nangala. 

Ohahende yepangelo oya holola kutya ndokotola ota tamenekwa yoo kutya okwa mona ombubo yoN$200 000 omo a kufa N$70 000 okufuta omupolifi oo taku hokololwa a futwa opo vati a vake mo efaila loibofa yaAbner Mateus. 

Nakanduungile okwa nyamukula natango kutya kena ondjo mwaashi. 

Nakanduungile okwa pula omhangu opo imupe elifutile mo shaashi okuna ounona vashona vanhe ovo aveshe hava xupu muye. 

Ka kele koshibofa eshi, omundokotola ota tamanekwa yoo oibofa ya yooloka eshi vati a pitila peembululu okudja koAngola, okuuya moNamibia oyo a dimina kutya okuna ondjo. 

Nakanduungile okwa kalelwa po kohahende yopaumwene Petrus Elago. 

Ndokotola okwa li a tulwa moipandeko keemwiya dashinana muNovemba odula yad ja ko eshi omakonakono opolifi e mu kwatakanifa noshibofa sheponokelo la unganekwa nokukendabala okukufa omweeti woihokolola omwenyo.

Ndokotola okwa weda komwaalu wovafekelwa vaheyali, omo mwa kwatelwa Abner Mateus, Lukas Nekwiyu, Matheus Shipingana oo taku hokololwa a li nale omupolifi, Uusiku Petrus, Selma Bahn, Johannes Nghilifavali naPetrus Shikwaya. 

Opolifi oya holola kutya ovafekelwa aveshe ove li natango konima yokakuma. Opolifi oya holola yo kutya natango otashi dulika komwaalu wovafeekelwa ku wedelwe ngeenge omakonakono okwa i moule. 

She likolelela kolopota yopolifi, omweeti woihokolola okwa li a ponokelwa momafiku 17 Kotoba 2025 peumbo laye pOndangwa. 

Okwa li a yashwa momaulu, a tilwa omeva e na oudio mokuxwikwa hano ndele otuwa yaye tai dengwa omakende nokuningilwa ominyonena dimwe da wedwa po. 

Omhangu otai twikile okuninga omapwilikino moshibofa shaNakanduungile. 

-awakudumo@nepc.com.na