Auleria Wakudumo
Omundokotola Fillemon Nakanduungile okwa ninga omufekelwa omutihetatu womwaavo va tulwa moipandeko molweponokelo linyanyalifa olo la ningilwa omweeti woihokolola womomhangu yaNdangwa, Justine Shiweda.
Omukulunhu koshikondo shokukonakona oimbuluma moshitukulwa shaShana Frederick Ndjadila okwa dimina meenghundafana naKundana kutya Nakanduungile okwa tulwa moipandeko keemwiya daShinana oshivike sha dja ko eshi omakonakono opolifi e mu kwatakanifa noshibofa sheponokelo la unganekwa nokukendabala okukufa omweeti woihokolola omwenyo.
Nakanduungile okwa li a holoka momhangu yamangestrata yaNdangwa noku li natango konima yekumba.
Omhangu oya li ya anyena Nakanduungile elifutilemo molwomakonakono oo e na okuningwa moule.
Ndokotola okwa weda komwaalu wovafekelwa vaheyali, omo mwa kwatelwa Abner Mateus, Lukas Nekwiyu, Matheus Shipingana oo taku hokololwa a li nale omupolifi, Uusiku Petrus, Selma Bahn, Johannes Nghilifavali naPetrus Shikwaya.
Opolifi oya holola kutya ovafekelwa aveshe ove li natango konima yokakuma. Opolifi oya holola yo kutya natango otashi dulika komwaalu wovafeekelwa ku wedelwe ngeenge omakonakono okwa i moule.
She likolelela kolopota yopolifi, omweeti woihokolola okwa li a ponokelwa momafiku 17 Kotoba 2025.
Peumbo laye pOndangwa.
Okwa li a yashwa momaulu, a tilwa omeva mokuxwika hano oacid mOshiingilisa ndele otuwa yaye tai dengwa omakende nokuningilwa ominyonena dimwe da wedwa po.
Opolifi oya holola kutya eponokelo lomweeti woihokolola otashi dulika la etwa molwoshibofa shimwe shopombada osho a li ta longo nasho.
“Ovafekelwa ova taalela oibofa ngaashi ekendabalo lokukufa omwenyo, va unganeka okudipaa, okuponokela nelalakano okululumika omunhu kolutu, eshi va denga omakende otuwa nokuhanauna oinima yaye, nelongifo loifufuta poshiningwanima,” opolifi tai holola ngaho.
Opolifi oya indila moshiwana opo keshe ou e na ouyelele a ye mekwatafano meendelelo navo, oya ti eningilo lomatilifo kwaavo ve kwetele eeveta doshilongo komesho otali eta oumbada mekotamhango loshilongo nola pumbwa okutalika ko ongoshibofa sha kula.
-wakudumoauuleria@gmail.com