Rundu – Balimi bamasimu amanyinyani kwapurojekiti yeluilwe kimuuso ya Ndonga Linena, mwa sikiliti sa Kavango ya Upa bayemi famayemo akukena mwalisinyehelo, kakuli mbonyi yabona se oma kakuli haisa selaelwa, kasamulaho kampani yefa mulilo wa magesi ya Nored nekwalile mulilo, bakeñisa sikoloti sesifitela bolule babalalu. Taba kiyakuli Ndonga Linena ina nibubeke boitulezi feela kusina bababuleka bwamali afitelela bolule basupile, ili kalulo ye buñata bwa bayahi banaha Namibia batalimani niyona kuli bapalelwa kulekisa matomato, anisi, ni zeñwi cwalo zebalima niha kubonahala kuli lico zeswana zelimwa mwa naha South Africa lisekiswa mwa Namibia.
Mwaliviki zefelile Nored nekwalile kuisa mulilo kwa Ndonga Linena, ili taba yebeile baliminyana mwabutata kakuli sebaka latehelwa kimali amañata hala bonyi yese oma. Singwenju sa Nored hape sikweyuzi Shadikongo hala sikoloti sesifitelela N$692 000 mi nebakutiselize mulilo wamagesi teñi Labutanu viki yefelile, kasamulaho bazamaisi bateñi bane babonahala kukatazeha neba sholokotile nikufumana N$500 000 yene balifile, mi sebaikupela swalelo hala N$192 000 yene siezi, kono ba Ndonga Linena habasikalifa nihaili kobili hala sikoloti sa Nored sesifitelela bolule babalalu. Yomuhulu wa zakuambola wa Nored Lukas Simon, nabulelezi ba New Era kuli mulilo uka kutisezwa feela haiba sikoloti inge silifiwa kapa inge kufitwa fatumelelano yakuli sikoloti sikalifiwa cwañi.
Kupumiwa kwamulilo kubeile mwabutata baliminyana ba 25, kakuli kalulo yeñwi yatekisano kwasimu yena ni babeleki ba 37 muuso hausika cala kale sesiñwi kwateñi. “Haluna mali akulifa, luna ni sikoloti sa bolule babalalu. Lucalanga lihekele ze mianda yesupile kono halusika cala nihaili lihekele zelishumi. Kanako ya cwale ki baliminyana feela babana ni lihekele zeselaelwa”, nekubulezi muetapili wa Ndonga Linena Titus Andrias. Andrias naize basapatehile kutalimisisa falisinyehelo zabona. Sikoloti sikabelwa hala baliminyana ni balimi balipisinisi kwa purojekiti. “Bakeñisa kuli hakuna kwakulekisa bonyi halukoni kulekisa bonyi kuli lulife sikoloti, luna ni bubeke bobuñata kwasimu bwamali afita fabolule basupile kono hakuna kwakulekisa,” nekubilaezi Andriasi.