SWALISANO yesi yona hande mwa ketelelo ya kopano ya COD se tisize kuli mane Ndu ya Milao i sike ya fa kopano pene ya yona ya cwale yene tambekilwe ki mubuso kakuya ka pene ye fiwa likopano kaufeela za lipolitiki mwa naha.
Kopano ye bonahala kuli mwa nako ya cwale I yemi maefefe I aluhani fahali mi likwata kamukana ze peli neli nze li kokota kwa Ndu ya Milao ka kubata kuamuhela pene ili n`wi yeo.
Butata nebu tile muta Mueteleli wa kopano, mutompehi Ben Ulenga a n`olela lin`olo ku Sibuabui wa Ndu ya Milao, mutompehi Theo-Ben Gurirab ka kumu taluseza kuli yena Ulenga na kile mbalamanisa mutompehi Tsudao Gurirab kuba yo muhulu wa kopano ya swanela kubona ya kuamuhela mashilin`I kwa mubuso, ili situlo sesi bulelwa kuli ki chief whip ka puo ya sikuwa.
Kakuya ka licinceho ze, Gurirab ki yena feela mutu ya kona kuamuhela mashilin`I ya kopano ya COD.
Ulenga na kile a hanyeza kuli pene yene swanela kutambekwa yeo, neli ya COD mi kacwalo nesi ya mutu ali ka kuekeza kuli I swanelwa kulumelezwa mwa kabuka ka panga ya kopano.
Na tiiselize hape kuli pene yeo ye kopani hamohocwalo ili yona cheque ka sikuwa, haina siango ni limpangaliko za kulwana hala kopano mi kacwalo yena Ulenga isali yena Mueteleli wa kopano ya COD.
Ka ona manzwi a , Ulenga na bulezi kuli ha boni kuli kanti he ki ka mabaka afi Ndu ya Milao hai hana ni pene ya kopano sihulu ha kutalimwa kuli yena Ulenga ki yana kile afa maata kumembala wa kopano kuli a amuhele pene ye cwalo yeo.
Na kile a tumusa kuli kopano ina ni maata a kukena batu mwa lipula zeba bona kuli kize ba swanela ili lipula zeba kona kusebeza hande ku zona.
Lin`olo lana kile a n`ola yena Ulenga ku Sibuabui, neli tisize kuli mane Schimming-Chase ni Elma Dienda ba kone kuikopanya ni Sibuabui ni ku mu kupa kuli a sike a tambeka pene ya mashilin`I yeo ka kubulela kuli bona ki limembala-tota za kopano ya COD.
Ulenga na kile a bulela kuli, sa ikopanyize kale ni bayemeli ba hae ba mulao kuli ba kone kuzeka haiba inge kukonahala ni kulumelela kuli pene I konwe kuitusiswa ni kubona kuli kopano I lifa limembala ni babeleki ba yona hala litifo zen`wi.
Pene I taluswa kuli I yemi fa N$300 000.
Haki lwa pili kubona kopano ya COD inge I taselizwe ki likayamana la mashilin`i.
Mwa likweli ze peli ze felile, sikwata sesi ipiza kuba sa Ulenga nesi kile sa kwalulela muzeko mufumahali Schimming-Chase kalibaka la kuamuhela pene ya kopano.
Schimming-Chase na kile a bulela kuli pene yana amuhezi ne beilwe hande kono kasamulaho wa mazazi neku zibahezi kuli pene ne kilwe ya lumelezwa mwa kabuka ka kopano kaka swelwi ki panga ya NedBank mwa mulenen`I wa Windhoek.
Litatimende za panga neli kile za supeza kuli pene ya buima bobu likana N$265 000 ne lumelelizwe mwa kabuka ka lizazi la 19 Sikulu mi mwa kweli ye swana, pene ye swana nenze hohiwa ka shilin`I ze shelana.
Sitatimende sa panga si supeza kuli pene ye likana N$50 000 ne hohilwe ka kweli ye swana hane ina ni mazazi a 28.
Pene hape ye likana N$29 000 ne kilwe ya ngiwa mwa linako ze shelana mwa lizazi leli swana.
Kweli ya Muyana hane ina ni mazazi a mabeli ni a malalu, pene ye likana N$9 000 ni N$10 500 ne kilwe ya hohiwa. Isali mwa kweli ye swana, pene ye likana N$40 000 ne kilwe ya ngiwa ka lizazi la 11, mwa kweli yona ye swana ili yona Muyana.
Kopano ya COD I inzi mwa likayamana kuzwa feela mukopano wa yona kopano ono kile wa keta limembala zenca u mano feela mwa kweli yale ya Kandao mwa tolopo Keetmanshoop.
Kopano I talimezi muzeko o bata kubona linepo za liketisa zene ketile Ulenga inge li bulaiwa. Muzeko u litezwi mwa kweli ya Sope silimo se sinca.