Auleria Wakudumo
ONGWEDIVA – Lisa Nekanda, omulihongi okudja koshiputudilo shopombada moUnam oye a vena po epapa lokakadona dingi momaulikilo oipindi aNgwediva 2025.
Nekanda okwa kufa ombinga mefiyafano lokakadona dingi olo la li ko oufiku wEtine monhele yomaulikilo oipindi mOngwediva.
Saima Tjimupapa omulihongi mo-IUM Ongwediva okwa findana okakadona dingi okativali omanga Esperanza Martins omulihongi moUnam Oshakati a ninga okakadona okatitatu dingi. Tjimupapa okwa vena yo ongokakadona dingi momafano ile mokufanekwa.
Pefimbo tava kufa ombinga, okakadona dingi Nekanda oka holola kutya otaka popile ehongo lokoiputudilo yopaungoba. Nekanda okwa ti ota popile ehongo eli shaashi okuli omulihongihongi moshilongwa shomwaalu osho yo oDesign and Technology oyo i na sha noiputudilo yopaungoba.
Nekanda okwa holola yo kutya momukokomoko wokukufa ombinga mefiyafanepo eli, okwa mona eshongo eshi oinima konyala aishe ya ningwa moule woshivike.
“Molwaashi omadingonoko aeshe okwa ningwa moule wefimbo lixupi, onda loloka neenghono ashike nande ongaho inandi kwatwa kedilaadilo lokushuna omutwe moipeta shaashi onda li nda hala okuvena,” Nekanda ta holola.
Oukadona ava ova li ve li omulongo omo vatano va wamo medingonoko lashikula ko navatano ove shi pondola okukufa ombinga medingonoko laxuuninwa omo mwa dja okakadona kopedu dingi.
Oukadona ava ova li va kufa efiyafanepo momadingonoko a yooloka ngaashi edingonoko lomaudano, edingonoko lokuulika oikutu yokuyowa, oikutu yokonguloshi hano oevening gown, edingonoko lokuulika lokunyamukula omapulo okudja kovatokoli va yooloka nomadingonoko makwao a wedwa po.
Okakadona dingi okativali, Tjimupapa oka yauka mo yo nepapa lokakadona dingi mokufanekwa hano Miss Photogenic.