Abraham Mwanyekange

Oshilyo shomutumba wopashiwana Ephraim Nekongo okwa yandja omaano eesamende 40 koprimafikola Wangushu koshikandjohoololo Omundaungilo moshitukulwa Ohangwena oshivike sha dja ko. Nekongo okwa ti odula ya dja ko efimbo okwa li tava xwaxwameke shi na sha nomahoololo nokwa li a mona eindilo okudja kovakalimo vomOmundaungilo opo a vatele ofikola momhumbwe yeengulufikola osho yo omuhandjo wovanafikola.

“Paife ngaha eli enyamukulo ashike nda ninga kwaasho kwa li nda indilwa,” ta ti. Nekongo okwa ti eesamende ove di foloma po nale mwa dja eedopi da koya 2 000, ta ti eedopi otadi ka longifwa okutunga eengulufikola ile omuhandjo wofikola.

Nekongo ta ti hayo ashike ofikola a kwafa oyo. “Mo2024 Onda tungifa omaboloka a2 kOshatipamba combined, odula yadjako ondakwafela Oprimafikola Izimwe neesamende natango itunge eengulufikola. Odula yafaafana onda yandja natango omaano eesamende kofikola ya Erkki Nghimtina yokOhangwena itunge omaboloka eengulufikola,” ta ti.

Omwedi wa dja ko omukulunhu welongo moshitukulwa shOhangwena Isak Hamatwi okwa ti oshitukulwa osha pumbwa eengulufikola 720 opo pu kandulwe po omukundu wovanafikola tava longelwa koshi yomiti.

Nekongo menyamukulo okwa ti ota shakeneke epangelo ondjilakati. “Eedopi ofye vene hatu di folomapo mekwafelo loshiwana nokonima ohatu tameke nee okutunga eengulufikola opo ounona vetu vaha longelwe vali momiti,” ta ti.

Nekongo okwa ti nande eedopi edi tava longifa kadi li pomufika wepangelo oshidulife ounona tavalongelwa koshi yomuti. Nekongo okwa ti mopaife okwa pumbwa omakwafelo okudja kOvasamalia Ovanamutimanghenda opo eengulufikola adishe di kale dapwa.

“Eengulufikola dokOshatipamba oda pumbwa omitengi noipeleki, omanga koIzimwe, Nghimtina osho yo Wangushu otwa pumbwa natango eesamende dihapu opo tu shive oku tameka okutunga,” ta ti.

-abbenghilai@gmail.com