IIKOKOLA- Ovanhu omayovi okwa li va holoka momwaalu muhapu va nyika oluhodi okufidikila Sem Pendapala Nepando ou a fudikwa Olomakaya komukunda wavo moshitukulwa shaShikoto.
Nepando okwa xulifa momafiku 2 neudo konima eshi a yashwa nondjebo pefimbo kwa li a hangika moilonga ve li moshihongi shomukunda. Okwa li e li kapatashu womukunda Iikokola omo kwa li tava kundafana kombinga yoshikumungu shomulumenhu ou e mu dipaa, shaashi a wedela ekove laye. Okwa dipawa komulumenhu weedula 59 womushiinda shavo.
Efiku tuu olo loshihongi natango mwene womukunda Iikokola I-Ben Nashandi okwa monifwa oshiponga konima eshi naye a yandjwa nondjebo komulumenhu tuu oo. Nashandi oku li moshipangelo shaMedi Park mOngwediva ta mono epango lopaunamiti.
Nakudipaa oku li modolongo konima eshi a nyenwa omhito yoku li futila mo modolongo pefimbo a holoka momhangu yaNdangwa. Ova popi va yooloka ova hokolola tava ti Nepando okwa li omulumenhu omunambili noku hole okulonga pauyuuki.
Ounona vaye, omukulukadi waye, ookaume, ofamili, ovanailonga vaye nosho yo ovakwashiwana okwa li tava lili va nyika oluhodi, tava ti kutya Nepando okwa dipawa ehe na ondjo. Omukwaniilwa woshitunda shaNdonga Shuumbwa Nangolo okwa ti efyo laNepando ole va denga pomutima osho yo omalelo ayeshe opamifyuululwakalo moshilongo.
Okwa tanga ti Nepando okwa li omulumenhu ehe hole oinima ii, omulumenhu kwa li e na olukeno lokuyambidida ovakulupe momukunda.
“Onghundana ei otai nyemateke unene. Nepando okwa fila kondjoko molwashi okwa ya shwa pefimbo kwa li e li moilonga,” ta ti. Shuumbwa okwa ti ota twikile okukala Omukwaniilwa woshitunda shOndonga, ta wilike nombili no nande pa holoka onghundana ei ii.
Okwa kumaida oshiwana opo shi twikile okukala nombili shina oukumwe ndele ha ku li ku fila omadu molwashi osha puka.
Shuumbwa okwa lombwela omalenga aye opo a longe nondjungu okukwashipaleka kutya otaa kaleke po ombili noukumwe moshiwana.
Efiku loshivilo xupulifo shaNepando, mwene womukunda Iikokola Nashandi okwa tuma etumwalaka nomahekeleko omo ta ti kaume kaye okwa dipawa pefimbo kwa li ta lo ngifa ouyuuki. Nashandi okwa ti no nande e li moshipangelo, oku li mo a nyika oluhodi kefyo laNepando ou a dipawa.
“Fyee okwa li a shike a tu longo pauyuuki nelalakano lokukandula po omukundu woshikumungu shedu ashike omutondi Satana okwa kufa ondjebo ndele te tu yashe,” ta ti. “Tulumukwa nombili kaume kange. E djepo loye ola dengange pomutima,” Nashandi a popya momukanda wohekeleko wa leshwa. Nashandi okwa ti okwa dengelwa ongodi kOmupresidende woshilongo omo kwa li e mu talela po okutala kutya okwa lelepo ngahelipi. “Omupresidente okwa ti na ndi fikife omahekeleko kofamili yaNepando osho yo komukunda aushe,” ta ti.
Omukulukadi waNepando, Kornelia Nepando okwa popya ta ti omushamane waye ka kwa li e hole oinima ii ashike okuhole ombili.
“Enda po nawa omuholike wange. Onda kanifa omulumenhu e na olukeno ye okwa li e hole ounona vaye,” ta ti. Nepando okwa fiya po ounona vaye vatano.
Ounona vaye ova hokolola tava ti xe okwa li e hole landulafano, a fimaneka ehongo nokuhole okuninga ounona vaye omashendjo.
