Auleria Wakudumo
ONDANGWA – Ehangano loNamibia Fish Consumption Promotion Trust (NFCPT) ola yambidida etungo lokapale komaudano mOndangwa noshimaliwa shoN$300 000.
Okapale oka tamekwa nale okutungwa nomalongekido amwe okwa pwa nale okulongekidwa.
Omukulunhu wo-NFCPT, Victor Pea okwa ti ova itavela kutya oproyeka tai ningwa kelelo laNdangwa oya fimana shaashi elelo otali lalakanene okuhanga amwe omomalalakano a fimana moshilongo.
“Okapale itaka kwafele ashike Ovandangwa ndele otaka ka kwafela eenhele adishe da dingilila Ondangwa, onooli aishe koonono oshoyo oshilongo ashishe,” Pea ta ti.
Pea okwa ti eyandjo loshimaliwa ola kwatela mo elitule mo nefimaneko leeproyeka tadi linyenge moshilongo ngaashi naanaa oyo ya etwa po kelelo lodoolopa yaNdangwa.
“Oshi li koluhaela kutya Namibia oku li konima ngeenge tashi ya moupale vomaudano ve li pamufika, onghene edilaadilo lelelo laNdangwa ola pumbwa okuyambididwa opo tu mone oupale ve li pamufika moshilongo,” Pea ta ti.
Omukulunhuwiliki welelo laNdangwa, Ismael Namgongo okwa ti okapale haka ifanwa Ondangwa Sports Stadium otaka ka lundulula onooli notaka ka twa ovanyasha vahapu omukumo okukufa ombinga momaudano a yooloka.
“Otwa tameka ongondjodi nohatu shi pondola okuninga ondjodi oshili efiku nefiku. Mopaife, okapale oka tamekwa okutungwa.
“Elalakano letu okukala tu na okapale mOndangwa kel i pamufika woFIFA no World Athletics Standards,” Namgongo ta ti.
Namgongo okwa ti okapale itaka ka kala ashike ketanga ndele otaka ka kala yoo haka tondokelwa, mu na oikwa noipangifo yokunhuka omhani, omhana, naikwao aishe i li pamufika woWorld Athletics Standards. Okapale otaka ka kala yoo haka longifwa vati komaudano a yooloka ngaashi orugby, etanga lomokambaba, naikwao.
Okwa ti ondjodi ei otai ningi ashike oshili ngeenge omahangano aeshe (epangelo unene eeministeli depangelo oshoyo omahangano opaumwene) okwe litula mo nokuyambidida.
“Otwa pandula NFCPT eshi e ya okutuwaimina momhumbwe yoshimaliwa opo tu tunge okapale ketu nohandi indile omahango noikondo aishe mwa kwatelwa ouministeli u kwetele komesho ovanyasha, nexumekomesho lomaudano u waimine oproyeka ei,” Pea ta ti. Pea okwa ti oinima iheyali ya longwa nale pokapale omwa kwatelwa oshivelo opo hapa futilwa, omeva naikwao. Okwa weda po yoo kutya natango shihapu osha pumbwa okulongwa opo okapale ka fikame po.
Ta ti elelo lodoolopa yaNdangwa ola tameka oproyeka ei ashike ola pumbwa okuyambididwa opo oproyeka ipwe, ko okapale ka dule okulongifwa koshiwana ashishe moshilongo. Natango, okwa ti ota ifana ovanangeshefa aveshe moshilongo, nakeshe umwe ta dulu okukwafela elelo li pondole nokukwafa oshiwana.