OTUNGANGA – “Paife ngaha ondi na ounona vatatu ve limangeleka. Odula ya dja momwedi omu natango okaana kange kokamati oke likufa omwenyo. Momudo 2014 oshiveli shange oshe limangeleka.”
Aa omatumbulo aJohannes Haimbodi, xe yokamatyona oko vati ke limangeleka mexuliloshivike komukunda Otunganga, moshitukulwa shaHangwena.
Immanuel Haimbodi weedula 12 okwe limangeleka konima eshi vati a lundilwa kutya okwa kufa mo oWhatsApp mongodi yaxe.
Haimbodi okwa li e li mondodo onhihamano kofikola Otunganga Combined School.
Ina yaHaimbodi, Sarafina Nghikongwa okwa tambulilwa moshipongelo shEenhana a kwatwa kohonde ya londa.
Pefimbo Kundana a talela po eumbo lavo komukunda Otunganga, xe Johannes Haimbodi okwa hokolola ta ti okwa lombwela omona kutya okwa danena ongodi yaye.
“Konima eshi nde mu lombwela kutya okwa danena ongodi yange okwa tameka ta kwena. Nokudja opo okwa ya mepya ta kwena,” ta hokolola.
Haimbodi okwa ti konima yefimbo okwa landula eemhadi daImmanuel opo e mu lombwele va ka nwefe oikombo.
“Onda tameka okulandula eemhadi daye fiyo omoixwa. Onde litwa olutu laye li li meemhango a fa e li ofika,” ta hokolola.
Okwa ti okudja opo okwa ufana Immanuel ashike ita nyamukula.
“Ila mumati wange tu ka nwefe oikombo. Nghee ngaa handi ku kongo mboli owa hondama oku. Ila tu ye nokuli,” Haimbondi ta hokolola pefimbo kwa li ta ufana omona.
Haimbodi okwa ti okudja opo okwa ya popepi puImmanuel nokutwikile oku mu ufana ashike okwa mwena.
“Mboli okaana kange oke li meemhango. Onda shuna meumbo opo ndi ka lombwela omukulukadi wange,” ta ti.
Lopokati opo, Haimbodi kwa koleka ta ti Immanuel haye mboli a kufa mo oWhatsApp mongodi yaye.
“OWhatsApp mboli oya kufwa mo mo komuteku wange. Omutekulu wange okwa ka popya kutya mboli oye kwa li ta danene ongodi yange,” ta hokolola.
Okwa weda po ta ti Immanuel okwa shanga pedu popepi nomuti opo e limangelekela a shanga po ta ti: “Haame nda kufa mo oWhatsApp mongodi yatate,”
Pefimbo e li moshipangelo, Nghikongwa okwa hokolola ta ti kakwa li shipu okumona ounona vaye molwaashi okwa pita momatando mahapu pefimbo lokupulumuna.
“Onda mona oixuna okutekula ounona vange. Okwa li nda pewa omaano ounona vahamano ashike paife onda fyaala po nounona vatatu,” Nghikongwa ta ti.
Okwa tanga Immanuel onga okamati ke na omikalo, onghee okwa ti mboli eshi Immanuel a shanga kutya haye a kufa mo oWhatsapp mongodi yaxe, ota popi oshili kwa li.
“Eumbo letu ola pumbwa okwilikanenwa molwaashi omu na omhepo ya kaka tai piyaaneke oludalo lange,” ta ti.
Okwa kumaida ovadali vakwao opo va kale tava popi nokutonatela nawa ounona vavo ngeenge va handuka unene ngeenge okaana ta ka ti oka lundilwa.
Okwa ti omumati waye woshiveli okwe limangeleka momudo 2014 konima eshi a dipaa omukainhu waye, omanga umwe okwe limangeleka omudo wa dja ko konima eshi vati a monifa otuwa yaxe oshiponga e i denga mekuma.
Oshiningwanima shikwao, omulumenhu weedula 24 okwa xwika po eenduda nee meumbo nokonima okwe limangeleka.
Oshiningwanima osha ningwa Osoondaxa komukunda Outwilo moshitukulwa shaHangwena.