Zebaldt Ngaruka

Bethuel Ngajoo Mbuende, oruveze roharive ndo ngwari omuiisane, ma rarakana otjomurikuramene mokarukondwa komatoororero ka Tjombinḓe momatoororero wotukondwa nozongomainde mu Tjikukutu. 

Mehungi re katjisupi ku nOnew era, wa tja nambano oruveze rwa horo okutunga otjiwaṋa. “Mbe rihungiririre okuumba ohanduka yandje mokaongo okurira orata yokarukondwa komatoororero mena rokutja otjiwaṋa matji ndji hepa,” ma tja. 

Na raisa kutja omukarere wotjiwaṋa ngu vasisa eraka romitanda, ovanene novakurundu “nu eye ouṋe okutja kako tji mave vanga kutja ma kawondje komurungu okuveungurira?” me ripura. Na raisa ouhepe womeva nohepero yozomboora zorutjeno rweyuva; ondanda yoporise pOherena na Koutjove otjoviṋa mbi mavi hepwa tjimanga neye ku ma yandja ko ombango rutenga. 

Nungwari omuiisane wOmurari ma pambarere kutja ma kondjo kutja kangamwa auhe mOtjombinḓe, tjinenenene ovakurundu we pewe onḓengu, ondengero nokuvarwa. Nandarire mouhonge we, Mbuende omutjuukwa nawa otjomuzeure wotutu twovanyande votjimbere, nu ma yanisa okuuungurisa kangamwa ounongo mbwe nawo womekurisiro okutunduuza otjiwaṋa tje. 

Omuture wa Kapendje mape ya aku zu eye movakwao voruveze rwe erike oomundu ngwa katuwa pehi posi ya ngu ha munika nao otjomutjayere wotjimbere kongotwe morutanga rwa kandino ndi okuutira kOmaroon Brothers ngunda e hi ya pita mehi okutaurira kOtjauana ma kanyanda motjira tjOporise.

Okukotoka monganda wa nyandera ovira tjimuna Okaserandu (Oafrikan Stars); Oblue Waters; Ingweinyama (Otigers) notjira tjehi, Obrave Warriors indji yOvarwe Omapenda. 

Ngu ma tjiukwa nawa o ya Rasta motjitamba tjotjimbere, eye omuyande wokongotwe mokati ngu hi na aa tira okutoora etanga okuza kongotwe oku ri twara komurungu. 

“Wina mbaari norupa okuzeura omitanda vya Maheke otutu mbya kakara norupa momararakaneno ovikando pekepeke mehi ndi Obelgium,” me rizemburuka.