Charles Ndeumane
ONGEWEDIVA – Manga aantu oyendji ye wete kutya oongongo ohadhi eta po ashike omagongo nomagadhi gokulya, omukalimo gwomOngwediva Nangula Mwanyangapo okwa nduluka po omukalo gwokuninga ondjema yopamuthika gwopombanda ta longitha oongongo. Kakele kokwiimonena iiyemo, oha kwathele wo aanuulema naamboka ye li mompumbwe.
Mwanyangapo okwa ti okwa ndhidhilike kutya Aanamibia oye hole iinima ya longwa moongongo, ye ta ndhidhilike ishewe kutya oongongo odhi na omauwanawa ogendji ngele tashi ya kuundjolowele oshoka oshinima shopaushitwe. Okwa kwatwa kedhiladhilo lyokugwedha ongushu koongongo opo Aanamibia ya tyapule oshilongomwa shoka ye hole.
“Onda tameke nongeshefa ndjika momumvo 2010. Onda ndhidhilike iilongomwa yoongongo oyi holike, ashike ohandi mono oongongo tadhi hepa, tadhi liwa kiikombo oshoka omigongo dhimwe ihadhi kolwa. Onda tokola okugwedha ko ongushu koongongo e tandi eta po ondjema shaashi aantu oye shi ashike omagongo nomagadhi goongongo,” Mwanyangapo ta ti.
Mwanyangapo okwa ti omwaalu gwaalandi yondjema ndjoka ogwa koka onkene oha imonene mo iiyemo, ashike kakele kiiyemo oha iyambele uunona wu na uulema moosikola ngaashi Eluwa, he wu pe ondjema opo wu tyapule oshgomwa shaNamibia.
“Iha tu longitha iinima oyindji mo ku ninga ondje ndjika ngaashi aantu yamwe ha ye shi ningi, oha tu kwashilipaleke kutya ka yi na uupyakadhi kuundjolowele waalandi yetu. Oha tu gwedha mo ashike osuuka nuunima wezimba ewanawa,” osho Mwanyangapo a popi ngaaka.